Гьал къоязда Крымалъул Алушта шагьаралда тӏобитӏана Россиялъул Югалъул халкъазул культураялъулгун спорталъул ХӏI фестиваль. Лъабго къоялъ халат бахъараб гьелда гӏахьаллъана 14 команда. 13 спортивияб тайпаялъул рахъалъ Дагъистаналъул командаялъул мухъилъ фестивалалда цеве вахъана 54 спортсмен: квер багъизаби, баскетбол, рачелалгун гугари, гиря борхи, тӏадагьаб атлетика, столалда хӏалеб теннис, квар цӏай, чӏорбутӏ речӏчӏи, мини-футбол, шахматал, шашкаби ва цогидабги.
Чӏорбутӏ речӏчӏиялъул рахъалъ Дагъистаналдаса спортсмен Шахмир Гебедовасде вахарав спортсмен фестивалалда вукӏинчӏо. Ракӏчӏараб бергьенлъиги босун, меседил медалалъе мустахӏикълъана гьев.
Столалда теннис хӏаялъул рахъалъ лъикӏал хӏасилал рихьизаруна Елена Тузовалъгун Темирлан Хасбулатовас. Командабазда гьоркьоб гьел кӏиязго ккуна лъабабилеб бакӏ. Шашкаби хӏаялъул рахъалъ кӏиабилеб бакӏ щвана Убуша Ангряевасе. Гьебго спортивияб тайпаялъул рахъалъ командабазда гьоркьоб нилъераз ккуна ункъабилеб бакӏ.
Бищунго къуватабин цӏарчӏвараб квар цӏаялъул рахъалъ Дагъистаналъул тӏаса бищараб команда къецазда финалалде борчӏичӏо. Гьелъие гӏиллалъун лъугьана финалалъул бащдаб бутӏаялда Ингушетиялъул спортсменалгун къеркьолелъул нилъеразул цоясул чорхол лагаялъе жагъаллъи ккей.
Мини-футболалъеги мадар гьабулеб букӏана дагъистанияз. Гьеб спортивияб тайпаялъул рахъалъ жидерго къокъаялда гьоркьоса къватӏиреги рорчӏун, финалалъул бащдаб бутӏаялда Калмыкиялъул командагун хӏалаго, 2:0 хӏисабгун бергьунел рукӏана нилъер футболистал. Амма, щиб ккарабали лъаларо, кӏиабилеб таймалда жидерго кавабахъе жавабалъулаб кӏиго гол биччана гьез. Пенальтиял кьабиялъул къецалдаги къуна дагъистаниял.
Палхӏасил, нилъераз фестивалалда ккуна лъабабилеб бакӏ.
Тӏоцебесеб бакӏалъе мустахӏикълъана фестивалалъул хважаинзаби -Крымалъул спортсменал. Кӏиабилеб бакӏ щвана Краснодаралъул тӏаса бищараб командаялъе.
Фестивалалда ккарал хӏасилаздаса жив цо тӏубанго рази гьечӏин бицана Дагъистаналъул командагун Алуштаялде ун вукӏарав республикаялъул Спорталъул министерствоялъул физкультураялъулгун спорталъул управлениялъул нухмалъулев Халитбег Махӏачевас.
-Ракӏчун рукӏана ниж нилъер командаялъе Крымалда тӏоцебесеб бакӏ щвезе букӏиналда. Амма иргадулаб нухалдаги бичӏчӏана спорталда кинабго нилъее бокьухъе букӏунареблъи. Нижее Алуштаялда гӏечӏеб жо ккана цого-цо икъбал, спортсменазул чорхое ккана жагъаллъаби. Гьеб кинабгоги хӏисабалде босун, 14 командаялда гьоркьоб лъабабилеб бакӏги гӏураб бугин абулелги руго. Амма ниж хӏасилаздаса тӏубан рази гьечӏо.
— Фестивалалъул даражаялъул, гӏуцӏа-къаялъул хӏакъалъулъ щиб абилеб?
-Тӏоцебесеб иргаялда, абичӏого гӏоларо, Алушта батана кутакалда берцинаб шагьар. Гьенире щварабго тира-сверана, хӏухьбахъи гьабуна. Дун вукӏана эпидемиологияб ахӏвал-хӏалалда бан фестивалалде цо гӏемерго гӏадамалги рачӏинарин, интересаблъунги букӏинарин абун. Амма Крымалъул нухмалъиялъ гьелде кӏвар кьун бугоан. Кинабго ана лъикӏаб даражаялда.