Талихӏкъосарал ишал ккечӏого рукӏине
Лъималазда чара гьечӏого малъизе ккола нухазда хьвадиялъул
Гьоркьоса къотӏичӏого Махӏачхъалаялъул УМВДялъул ОГИБДДялъул хӏалтӏухъабаз шагьаралъул школазул цӏалдохъабазда бицуна нухазда низам цӏунизе кколеблъиялъулги нух бахунаго тӏадал ишазулги хӏакъалъулъ. Гьеб бициналъе гӏиллаги буго, нухкъотӏун унаго, лъимал машинабазде гъоркье кколел рукӏиналъул хӏужаби гӏемерлъулел рукӏин. Масала, исана сон байбихьаралдаса нахъе нухазда авариял ккеялъул хӏасилалда лъукъа-къотӏана 21 лъимер. Бищунго цӏуна-къазе ккола балугълъиялде рахинчӏел лъимал. Гьабсагӏаталдаги Госавтоинспекциялъул бищунго кӏвар цӏикӏкӏараб хӏалтӏилъун ккола лъималазул гӏумруялъе хӏинкъигьечӏолъи букӏинаби. Нухазда ккарал лъугьа-бахъиназул хӏасилалда лъимер хвей яги лъукъи ккола хъизамалъулго къварилъи. Гьединлъидал щивав чияс гьабизе ккола цӏодорлъи. Шоферзабазги цӏунизе ккола нухазда хьвадиялъул низам, гьабизе ккола сабру, гӏедегӏун машина бачиналъ, талихӏкъосарал лъугьа-бахъинал кколеблъи кӏочене бегьуларо.
Нухазда хьвадиялъул низам хвезабиялъул мисал, тӏоцебесеб иргаялда, бихьизабулеб буго чӏахӏияз. Гьез светофоразухъцин сангьабулеб гьечӏо.
Хӏурматиял ракьцоял! Нилъеда бараб буго лъималазул букӏинесеб къисмат. Нилъее киназего бокьула лъимал цӏодорал, лъай-гӏакълу бугеллъун лъугьине, амма гьебго заманалда нилъецаго кумекги гьабула лъималазул гӏумру бигъиналъе.
Хӏурматиял шоферзаби! Кӏваркье лъималазде, нухазда гьезул хӏинкъигьечӏолъи цӏуниялде — лъимал гӏодорчӏезе рихьизарурал хасал бакӏал руго маршруткабазда жанир, гьелде тӏадеги цадахъго руго хӏинкъигьечӏолъи цӏунулел рачелалги. Гьел хӏалтӏизариялъухъги халгьабе.
Радик Хӏапизов,
Махӏачхъала шагьаралда бугеб РФялъул
УМВДялъул ОГИБДДялъул пропагандаялъул инспектор
Лъазаби
«Цӏияб бербалагьи»
Гӏолилазухъа бажаризе ккола жакъасеб къоялъул
лъугьа-бахъиназе ритӏухъаб къимат кьун
«Гӏолилазул дунял» абураб регионазда гьоркьосеб жамгӏияб гӏуцӏиялъги, Россиялъул Транспорталъул министерствоялъги, Россиялъул генералияб прокуратураялъги, Россиялъул нухазда хӏинкъигьечӏолъи цӏуниялъул рахъалъ МВДялъул бетӏераб управлениялъги лъазабулеб буго «Цӏияб бербалагьи» абураб социалияб рекламаялъул рахъалъ тӏолгороссиялъул конкурс.
Конкурсалъул аслиял темаби руго гьадинал:
1) «Ришватчилъиялде данде къеркьей».
2) «Транспорталда хӏинкъигьечӏолъи цӏуни — щивасул ва киназулго иш».
3) «Жавабчилъи бугев донор».
4) «Медицинаялъул тӏадегӏанаб хъулухъалъе киназего руго ресал».
5) «Нухазда хӏинкъигьечӏолъиялъул рахъккола гӏолилаз».
Къецалда гӏахьаллъизе бегьула 14-30 сон барал гӏолилал. Гьеб тӏобитӏулеб буго 2009 соналдаса байбихьун. Гьелъие кьучӏ лъурав Евгений Мартыновас абулеб буго гӏолилазухъа бажаризе кколила жакъасеб къоялъул лъугьа-бахъиназе ритӏухъаб къимат кьунги, социалиялгун экономикиял суалал тӏуразарунгиян.
Хӏалтӏаби къабул гьарула 2018 соналъул 20 сентябралде щвезегӏан, конкурсалъул хасаб сайталда бугеб «Социалияб плакат», «Социалияб видеоролик» абураб кӏиго номинациялда рекъон.
Дагьабги мухӏканго къецалъул хӏакъалъулъ цӏализе бегьула гьаб сайталда: http://tvoykonkurs.ru/about/docs