Ахирал соназда хисулел рукӏараздаса 20 нухалъ цӏикӏкӏун токалъул хӏубал хисун руго исана республикаялда (7 120 хӏуби), лъабго нухалда цӏикӏкӏун рачун руго токалъул кваралги (146, 8 тонна). Анлъго нухалъ цӏикӏкӏун трансформаторалги къачӏан руго (887 подстанция).
Гьедин бицана журналистазе «Дагъистан» РИАялъул редакциялда гьелгун дандчӏварав «Россети Северный Кавказ» – «Дагэнерго» ПАОялъул Управлениялъул начальник Къурбан Гӏумаровас.
Гьедин хасалиде хӏадурлъиялъул рахъалъ хӏалтӏи жидер компаниялъ 95 проценталъ тӏубазабунин бицана гьес. Гьебги гьабунила пандемиялъул заманалда чӏезарурал гьукъа-къаязухъги балагьичӏого. Хутӏараб щуго проценталъ хӏалтӏи нухда хутӏун буго, къайиги босун къватӏисахун рачӏунел чагӏи кватӏиялъ. Гьанже тӏаде щун рагӏула гьеб къайи.
Ток сванилан гӏадамазул аслияб ахӏи-хӏур Махӏачхъалаялдасан букӏунелъул, Гӏумаровасе кьолел суалалги тахшагьаралда хурхарал рукӏана. Гьес бицана Махӏачхъалаялда капиталияб куцалда къачӏанила 37 подстанция, хисанила 10 трансформатор.
Гьел киналго хӏалтӏаби гьаризе Дагъистаналъул энергетиказе кумекалъе ахӏун букӏун буго «Россети Северный Кавказ» компаниялъул 25 бригадаги.
Гьединго транспорт хьвадизе санагӏалъи гьечӏел бакӏазде жидер къайи босизе кӏудияб кумек магӏарухъ ругел гӏадамаздасаги щванин бицана Къурбан Гӏумаровас. Гьал къоязда интернеталда бугоан Цӏумада районалъул цо росулъе гӏадамаз жидецаго баччун унеб трансформатор.
Хасел тӏаде щванщинахъе магӏарухъ ток щай дагьлъулеб, яги свинабулеб, гьалгощинал ГЭСалги рукӏагоян, «Хӏакъикъаталъул» рахъалдасан кьураб суалалъе Гӏумаровас жаваб кьуна гьедин бицинегӏан гӏемер свинабуларила доба ток. Свинабуниги, басралъараб техникаги кваралги хисизегӏан ссунеб батилила гьеб. Гьединго, напряжение дагьлъиялъе гӏиллалъунги гьес рикӏкӏунеб буго гьанже гӏадамаз электроприбораздаса цӏикӏкӏун пайда босулеб букӏин.