Мугӏрул чӏужугӏадан, гӏемерал соназ
Гӏодана поэтал нужехъ ралагьун.
Нужер къварилъиги нужер къисматги
Къалмикье босана, угьдилаго, гьез.
Расул Хӏамзатов
Кӏудияв шагӏирасул гьал рагӏаби гьанжеги ракӏалде щвана, магӏарулалги хирияй магӏарулазеги йокьулей Патӏимат Рамазановалъул хӏакъалъулъ хъвазе лъугьиндал.
Мугӏрул чӏужугӏадан! Унго-унголъунги хӏисаб гьабураб мехалда, дур намусалъул тӏадегӏанлъи. Согӏал кьурабазги пахруго чӏухӏарал рорхатал мугӏрузги тарбия кьураб дулъ абадиялъго бессун хутӏун буго чармилаб гӏамал. Амма гьелда недегьлъиялъги хӏалимлъихӏеренлъиялъги рекьарал накъишаз дагьабги берцин гьабун буго дур тӏадегӏанлъи.
Гьеле гьединай йиго нилъер Патӏимат. 62 соналъ щибаб рогьалилъги къасиги гьелъул, «Кӏалъалеб буго Махӏачхъала» абун байбихьулеб калам боржунаан щибаб магӏарул росдал рокъобе. Патӏиматил гьаркьидаго цадахъ вачӏун аскӏове щолаан Нурмухӏамад Гӏусмановги.
Дунин абуни, гӏолохъанлъиялдаса нахъе ине бокьуларогоцин йикӏана, гьей хӏурулгӏиналъухъе гьоболлъухъ щведал – дойго Патӏимат, добго гьаракь, гьайбатаб гьумералда бохьун чӏараб добго гьими. Санал цӏикӏкӏун ранагӏан, гӏолохъанлъулей йигей нилъер Патӏимат. Гьале доб жинцаго жиндиего хӏадур гьабураб цӏакъго берцинаб херлъи. Гӏумруялъ Патӏиматил къисматалда толел ругел талихӏалъул лъалкӏал.
— Рачӏая, рачӏая, дир меседал, — иланги абун, гьей данде ячӏиндал, ниж рохана. Ва гара-чӏвари байбихьана Патӏиматил гьимиялдасан.
Гьале гьай бика йигоха нижер къавулъ бищунго кӏудияй, — илан абуна Патӏиматица горбода хурхун ячӏарай ясалъул ясалъул ясги гьениса йичӏизаюлаго.
Ясазул лъималазулги гьезулги лъималазулги бицунелъул, Патӏиматил гьурмал кунчӏи дагьабги гвангъана.
— Кинабго кьун букӏана Тӏадегӏанас. Бокьулеб хӏалтӏиги, роцӏараб хъизанги, хъизамалъул гъасда гвангъун рекӏараб цӏаги, цӏадул хъаравуллъуда талихӏги. Жиде-жидер хъизанрукъалда лъималги, гьезулги лъималги. Тӏокӏабги кӏудияб талихӏ щибха букӏинеб чӏужугӏаданалъе – гьелъие талихӏ лъималазул бадисанлъидал гьимулеб.
Гьаб бакӏалда дагьайго лъалхъана Патӏимат. Ва нижеца хабар хисизабуна. Кӏодоэбелалъул пикраби рихха-хочизаризелъун ургъунго ячӏарай кинигин нижеде аскӏое щвана хъизамалъул бищунго кӏудияй гьитӏичги. Патӏиматида убачал гьаризе жуяна гьей ва цинги лъутунги ана.
Дол талихӏал лахӏзатаз гьалда жеги бичӏчӏулеб букӏун батиларо хвелалъ жиндир талихӏалде ишан босун букӏин.
Ва …Талихӏ сверана рагӏадалде. Квачараб рагӏадалде. Амма гьеб рагӏдукь течӏо къисматалъ бахӏарчияй магӏарулай. Патӏиматица гӏезарулел рукӏуна ясазул маулхӏаятал. Кӏиго ясалдасаги цохӏо вугев васасдасаги хвелалъ ятӏа гьаюниги, къисматалда кӏвечӏо гьей къуркьизайизе. Гьелъул гӏаксалда, къисматалъул кьаби щванагӏан, щулалъулей йикӏана. Гьелъул ресги букӏинчӏо загӏипайлъун йикӏине магӏарулаздаги жинда божун ругел ясазул анкьго лъимералдаги цее.
— Дица къабул гьабуна къисматалъ къачӏан батараб лъабабго «сайгъат». Гӏумру дагьабги хиралъана дие. Щайгурелъул гьанже дица гьеб тӏамизе кколаан дагьабги кӏудияб жавабчилъиялда ва тӏадегӏанлъиялда. Гьелда бараб букӏиндалха дир тӏанчӏазул хадусеб къисмат. Дида лъалеб ва бичӏчӏулеб букӏиндалха Тӏадегӏанасда цебе дир цӏобалде ккарал лъималазул жаваб кьезе ккезе букӏин. Рецц Аллагьасе, гьеб борч дихъа тӏубан бажаридал. Анкьго лъимералда гьоркьов вукӏана ункъо вас. Гьезул ургъел букӏана диде баччун, кӏияйго ясалде регӏулейго йикӏинчӏо дун.
Киналдай лъугьина, цощинаб, кинаб бугониги, гъалмагъиралде гьоркьоре ккеладай, хъизан-рукъ нечараб жо ккеладай? Гьадинал суалаз рахӏат толеб букӏинчӏо дий. Амма гьез дир ракӏ лъукъараб жо киданиги гьабичӏо. Аллагьасул кумекалдалъун дица гьел нухарегӏана гӏумруялъул нухазде. Гьанже анкьазулго буго жиде-жидер хъизанги, лъималги, хӏалтӏиги. Дунги рази йиго дирго къисматалдаса. Гьалгощинал санал разегӏан дунялалдаги йиго, лъималазул лъималазги гьезул лъималазги кьолеб бугеб талихӏалде бадиеги ялагьун, — илан бицана Патӏиматица.
Жакъа Патӏимат гӏодой чӏун йиго жинцаго жиндиего къачӏараб жиндирго берцинлъиялъул тахида. Унго-унгоги, гьеб тахалъул нуралъ тӏолабго магӏаруллъиго къалъизабун бугеб хӏисаб. Гӏорцӏулей йикӏинчӏо дун, гьеб берцинлъиялъухъ ялагьун.
Гьале дол, ракьалда толел ругел лъалкӏал. Йихьун лъалей гьечӏонигицин, киналго магӏарулазе гӏагарайлъун лъугьарай ва хутӏизе йигей Хӏурматияй Патӏимат Рамазанова.
Цадахъ йикӏарай Зульфия Хӏажиевалъ гьелда гьарана цоги нухалда такрар гьабейин къойида жаниб кӏиго нухалда магӏарулазе кьолеб букӏараб салам.
Ва гьале цо чанго лахӏзаталъ ниж тӏад руссана дол саназухъе, ва цӏидасанги дие цӏилъана Патӏиматил сипат:
— Кӏалъалеб буго Махӏачхъала. Рорчӏами, хириял магӏарулал…
— Йорчӏами, хӏурматияй Патӏимат. Гьединаб берцинлъиялъул тахида даимаб парахалъи батаги дуда.