10 марталда Москваялда, РФялъул хӏукуматалъул председателасул заместитель Виктория Абрамченкогун дандчӏвана ДРялъул нухмалъулев Сергей Меликов.
Гьез гьоркьоб лъуна республикаялъул северияб рахъалда ругел ракьал ракъдаллъиялде сверулел рукӏиналъулги чанго соналъ бацӏцӏад гьабичӏого тараб Терек гӏурул тӏину хӏабтӏил цӏеялъулги суал. Гьелда бан Сергей Меликовас рахӏатхвей загьир гьабуна их щведал гӏорги къватӏибе кӏанцӏун, сверухъ гӏумру гьабулел гӏадамазе зарал ккезе рес бугилан.
Гӏор бацӏцӏад гьабиялда хурхараб буго Аграханалъул залив, гьединго ччугӏбуз тӏинчӏ биччалел Аракумалъул, Гъоркьияб Терекалъул хӏорал цӏунизе бажари. Гӏураб къадаралда гьениб лъим бугони, лъикӏ букӏуна сверухъ ругел ччугӏа гӏезабулел магӏишатазеги жибго экологиялъеги.
Гьединго Сергей Меликов дандчӏвана улкаялъул хӏукуматалъул вице-премьер Александр Новакгунги.
Гьез дандрана республикаялде инвестициял рачӏинариялда, ТЭКалъулгун ЖКХялъул система рукӏалиде ккезабиялда, газ бачиналда, дагъистаниязе хӏалтӏизе бакӏал чӏезариялда хурхарал суалал.
Масала, газификациялъул программаялда бихьизабухъе, 2025 соналде нилъер гьаниб газ бачиналъул иш 79 проценталъ тӏубазабун лъугӏизе ккола.