Гьал къоязда ДРялъул нухмалъиялда тӏобитӏараб данделъиялда бицана республикаялда газ бачиналъул хӏалтӏи щиб даражаялде щун бу- гебали.
Президент Владимир Путинидаса байбихьун гьеб суалалде кӏвар кьолеб ва гьелда хурхун гӏуцӏараб хасаб программаги бугин абуна гьениб. Амма гьедин букӏаниги, газ бачинчӏого республикаялда хутӏун буго 11 район.
Меликовасул рагӏабазда рекъон, планалда бихьизабухъе, исана лъагӏалил ахиралде газ бачине ккола гӏадамаз жаниб гӏумру гьабулеб 2 100 минаялъубе. Жидехъе газ бачеян гӏадамаз МФЦязде, росабазул, шагьаразул администрациязде кьурал гӏарзабазул къадарги 1 843-ялде бахун буго.
Гьелдаго цадахъ руго гьеб газ бачине цебеккунго хӏалтӏи байбихьун букӏарал бакӏалги. Гьеб бачине ккола 23 333 минаялъубе. Гьелда тӏад харж гьабизе буго 3, 7 млрд гъурущ.
ДРялъул захӏматалъулгун социалияб рахъалъ цебетӏеялъул министр Гӏабдурахӏман Махӏмудовас бицана цо-цо чагӏазе пачалихъалъ бецӏулин минаялда жанибе газалъул чагӏаз гьабулеб хӏалтӏухъ (ракьулъан газалъул рогӏрал рачаралъухъ, рокъор газалъул алатал рекъезаруралъухъ) унеб гӏарац. Гьел ккола Кӏудияб Ватӏанияб рагъулгун тылалъул ветеранал, къороллъуда хутӏарал гьезул лъудби, лъимерлъуда концлагеразде ккарал гӏадамал, тӏоцебесеб группаялъул инвалидал, моцӏрое щолеб хайир рукӏа-рахъиналъе хӏалтӏизабулеб гӏарцудасаги дагьал хъизамазда сакъатал лъимал ругел чагӏи, лъимал гӏемерал хъизамал.
Гьезие гӏарац биччала республикаялъул бюджеталдаса.
Гьединго документал гьечӏел минаби гӏемерлъиялъги квалквал кколеб буго газ бачиналъе. Росреестралъул сияхӏалде гьел росизе документал электроннияб къагӏидаялдаги кьезе бегьулин бицана Росреестралъул нухмалъулев Арсен Пирмухӏамадовас. Жидеца гьанже бигьалъизабун бугин гьел щолеб къагӏидаянги абуна гьес.
Республикаялда гӏезегӏан хӏалтӏи гьабун буго газалъул рогӏразул магӏишат рукӏалиде ккезабиялъе. Рогӏрал лъил (кинаб идараялъул) бетӏергьанлъиялде кколелалиги лъазабун, жакъа къоялде анлъазарго километралъул манзилалда лъурал газалъул рогӏразул сияхӏ гьабун буго Ракьулгун мал-мулкалъул министерствоялъ.