ДРялъул Лъай кьеялъул ва гӏелмуялъул министерствоялъ республикаялъул учительзаби ахӏулел руго «Росдал учитель» абураб пачалихъияб программаялда гӏахьаллъизе. Гьелда рекъон росдал школалда хӏалтӏизе ине разилъарав учителасе кьолеб буго миллион гъурущги.
Программаялда гӏахьаллъизе бокьарав учителас цӏализе ккола 2020 соналъул 29 августалда ДРялъул хӏукуматалъ гьабураб №185 хӏукму. Гьенир рехсон руго проекталда гӏахьаллъизе ккани, цӏунизе кколел шартӏазул хӏакъалъулъ баянал. Къокъго абуни, гьелъие хӏажалъула педагогияб тӏадегӏанаб лъай ва 55 сонил ригьалде вахарав гьечӏолъи. Гьелде тӏадеги, хъвай-хъвагӏай гьабизе ккола http://zemteacher.apkpro. ru/ порталалда, тӏаса бищизе ккола ракӏрекъараб школа ва гьенибго тезе ккола программаялда гӏахьаллъизе рес кьеян абураб хитӏаб.
Исана хӏадурун буго 95 чиясе бакӏ. 2021 соналъул сентябралдаса нахъе жинца гӏумру гьабулеб бакӏалъул школалда хӏалтӏулев вугев учителасул ихтияр букӏунаро, «Росдал учитель» абураб программаялда рекъон, гьебго муниципалитеталъул цогидаб росулъе хӏалтӏизе ине.
Росдал учитель» абураб порталалда хитӏабал къабул гьарулел руго 30 апрелалде щвезегӏан. Документал къабул гьарула Дагъистаналъул лъай кьей цебетӏезабиялъул институталда (ДИРО) – тӏоцебесеб апрелалдаса 31 маялде щвезегӏан.
Конкурсалда гӏахьаллъизе къваригӏуна гьал хадусел документал: гӏарза (порталалда бихьизабун буго гьеб хъваялъул къагӏида), паспорталъул, тӏадегӏанаб лъай бугеблъи тасдикъ гьабулеб документалъул (дипломалъул), захӏматалъул книжкаялъул копияби, автобиография, судалда ккеялъул яги ккунгутӏиялъул ва уголовнияб цӏех-рех гьоркьоб къотӏизабиялъул хӏакъалъулъ справка, снилс, электронияб захӏматалъул книжкаялдасаги банкалъул лицевой счеталъулги баянал, персоналиял баянал, хӏалтӏизе ихтияр кьолин абураб хитӏаб. Киналго документал къабул гьарун рукӏине ккола нотариусалда.
Суалал ругони, кӏалъай гьаб телефоналде: 8 8722 67 84 71.
ДРялъул Лъай кьеялъул ва гӏелмуялъул министерствоялъул пресс-хъулухъ