30 апрелалдаса байбихьун 28 маялде щвезегӏан анкьида жаниб кӏиго нухалъ (арбагӏалъги шаматалъги) Москваялдаса самолетал роржине руго Дагъистаналде туристазулги рачун. Гьедин бицана 13 апрелалда ТАССалда тӏобитӏараб пресс-конференциялда «Интурист» компаниялъул генералияв директор Виктор Тополкараевас.
Туризмалъул хӏакъалъулъ бицунеб гьеб тадбиралда гӏахьаллъана Россиялъул регионазул цо-цо губернаторалги, Дагъистаналъул бетӏер Сергей Меликовги, Ростуризмалъул нухмалъулей Зарина Догузоваги, цогидалги.
«Интуристалъ» гьединал рейсал Дагъистаналде тӏоцере гьаризехъин руго. Гьединго гьел ине руго Чачаналдегун, Ингушетиялде. Виктор Тополкараевас абуна рекӏадухъ багьаги 1,5-2 нухалъ дагьаб букӏине бугилан. СКФОялъул республикабазде гьабулеб, микьго къоялъ халатбахъунеб гӏаммаб тур букӏине буго гьеб.
Москваялдаса Махӏачхъалаялде гьарулел гьел рейсазул кӏудияб кӏвар букӏинин республикаялъеян абуна Сергей Меликовасги. Щайгурелъул риидал Москваялдаса Махӏачхъалаялде роржине цӏакъ захӏмалъула белталги хиралъун. Гьединлъидал хӏухьбахъизе рачӏунел туристал гьел самолетазда рекӏани, цогидаб мурадалъ (рокъоре щвезе яги хӏалтӏул ишалъ) республикаялде рачӏунел гӏадамазе бигьалъи лъугьинаан.