18 апрелалда Дагъистаналъул гуманитарияб институталда тӏобитӏана студентазул гӏелмияб дандеруссин. Гьеб нухда бачана ункъабилеб курсалъул студент Шагӏбан Мухӏамадовас.
Кӏалъазе вахъарав ДГИялъул ректор, техникиял гӏелмабазул кандидат Нухӏкъади Бахӏмудкъадиевас бицана жакъа дунялалда бугеб ахӏвал-хӏалалъул ва хӏалуцараб заманалда гӏелмуялъул бугеб кӏваралъул хӏакъалъулъ.
Дагъистаналъул гуманитарияб институталда гьарулел гӏелмиял цӏех-рехазул хӏасил гьабуна институталъул проректор, тарихиял гӏелмабазул доктор, гӏелмуялъулгун инновациязул рахъалъ проректор Хӏайбула Мухӏамадсалихӏовас. Масъалабазда гьоркьоб гьес рехсана студентазул ва преподавателазул проекталъулаб хӏаракаталде гъирабазабиялъе рес щолеб гьечӏолъи.
Гьанжесеб жамгӏияталда гӏалимзабазул хӏаракаталде кӏвар кьолеб гьечӏолъиялде пикру буссинабуна экономикиял гӏелмабазул кандидат, Гражданияб жамгӏият цебетӏезабиялъул ва инсанасул ихтиярал цӏуниялъул рахъалъ ДРялъул бетӏерасда цебе гӏуцӏараб Советалъул председатель, «Хӏакъикъаталъул» бетӏерав редакторасул заместитель Зикрула Ильясовас.
Студентазде хитӏаб гьабулаго, ДГУялъул философиялъул кафедраялъул заведующий, профессор Мустӏапа Билаловас абуна гӏелмиял докладазда гьоркьоб философиялъул масъалабазул хӏакъалъулъ бицунеб доклад къанагӏат гурони батуларин абун. Рехсана гьес гӏелмияб цӏех-рехалъе мустахӏикъал темабиги. ДГИялъе тӏахьалги сайгъат гьаруна.
ДРялъул Миллияб политикаялъулгун диниял ишазул министерствоялъул вакил Расул Хӏажиевас ракӏалде щвезаруна 1990-абилел сонал. «Доб заманалда нилъер гӏолилал унаан къватӏисел улкабазул диниял цӏалул идарабазда цӏализе. Батӏи-батӏиял пачалихъазул вузаздаса гьез нилъехъе бачӏана батӏи-батӏияб динияб пикруги. Гьелъул кьучӏалда бикь-бикьана жамгӏият ва ккана хӏалуцарал лъугьа-бахъинал. Жакъа республикаялда буго анлъго исламияб вузги 16 мадрасаги. Гьезул буго Рособрнадзоралъ ва Лъай кьеялъул министерствоялъ кьурал лицензияби. Нилъер вуго исламиял гӏелмабазул 12 доктор. Гьединаб хӏаракаталъул хӏасил буго жакъасеб парахалъи», — ян бицана гьес.
Дандеруссиналъул гӏахьалчагӏазе икъбал гьарун кӏалъана Башларовасул цӏаралда бугеб медицинаялъул колледжалъул директор Хӏусен Мамаевги Дагъистаналъул гуманитарияб колледжалъул директор Алаудин Наримановги.
Кавсарат Сулейманова