19 апрелалда Махӏачхъалаялъул ЦБСалъул Лъималазулгун гӏолилазул моделалъулаб библиотекаялда «Аваразул ракьалъул хӏакъалъулъ бицен» абураб музыкалиябгун литературияб тадбир тӏобитӏана. Гьелъул мурадги букӏана гӏолеб гӏелалъулъ халкъалъул тарихияб ирсалде, маданияталдегун гӏадатазде лъикӏаб бербалагьи куцай. Дагъистаналъул халкъазда гьоркьор ругел социалиял ва маданиял хаслъабаздехун адаб ва авар халкъалъул творчествоялде рокьи бижизабуна гьеб тадбиралъ цӏалдохъабазул ракӏазулъ. Моделияб библиотекаялда тӏубараб моцӏалъ тӏоритӏулел ругоан миллияб маданияталъул хӏакъалъулъ бицунел тадбирал. Гьаб нухалда гьениб авар халкъалъул маданияталъул, тарихалъул ва адабияталъул хӏакъалъулъ бицана цӏалдохъабазда.
Гьенир гӏахьаллъана Махӏачхъалаялъул №1 ва №4 гимназиязул цӏалдохъабигун мугӏалимзаби, №4 ва №5 Искусствоялъул школаздаса художествиял нухмалъулел, кьурдул ансамблял, кечӏ ахӏулел. Цӏалдохъабазе аваразул маданияталъул хӏакъалъулъ хӏакъикъат рагьана тадбиралде ячӏарай гьобол, ДРялъул культуралъул мустахӏикъай хӏалтӏухъан, Расул Хӏамзатовасул цӏаралда бугеб премиялъул лауреат, магӏарулазул шагӏир Тубхӏат Зургьаловалъ.
Библиотекаялъул хӏалтӏухъабаз берцинго нухда бачана цӏалдохъабазда магӏарул маданият ва адабияталъул бицунеб тадбир. Къокъго бицана магӏарулазул тарихалъул хӏакъалъулъги. «Щал кколел аварал» абураб видео-роликалда бицана нилъер халкъалъул къадруялъулги, тушманасе къуркьичӏел бахӏарчиял умумузулги хӏакъалъулъ. Кӏудияб гъирагун, сихӏкъотӏун гӏенеккарал цӏалдохъабазул ракӏазулъ жидерго миллаталдаса, гьелъул цӏар арал бахӏарзаздаса, бечедаб, къадруяб тарихалдаса чӏухӏи бижараблъи бичӏчӏунеб букӏана.
Цӏалдохъабазда бицана рахьдал мацӏ нилъее умумуз тараб ирс бугин. Миллаталъул кьучӏлъун кколеб рахьдал мацӏ лъалеб гьечӏони, миллатго гьечӏев чилъун хутӏулел рукӏиналде кантӏизаруна гьеб тадбиралъ лъималги чӏахӏиялги.
№4 искусствоялъул школалъул цӏалдохъан Шуана Асадулаевалъ кӏудияб махщалида цӏалана Фазу Гӏалиевалъул «Эбелалъул хъахӏаб шал» абураб кечӏ. Магӏарул ва гӏурус мацӏазда кучӏдул рекӏехъе рицине пагьму бугоан Асадулаевалъул. №1 гимназиялъул цӏалдохъабазги магӏарул мацӏалда кучӏдул рекӏехъе рикӏкӏине кӏудияб хӏаракат гьабулеб бугоан.
Цӏалдохъабазе ва тадбиралда гӏахьаллъаразе асар гьабуна искусствабазул №4 ва №5 школазул цӏалдохъабазул гьунаралъ. Магӏарулазул миллиял кьурдабиги, музыкалиял алатазда бакъналги хӏадурун ругоан искусствабазул школазул цӏалдохъабаз.
Гӏенеккаразе гӏажаибаб асар гьабуна искусствоялъул школалдаса цӏалдохъан Шамил Мухӏамадовасул кочӏоца.
Тубхӏат Зургьаловалъги цӏалдохъабазулгун аваданаб накъит гьабуна. «Дир гьайбатаб Алипба» тӏехьалъул хӏакъалъулъги бицана, гьелдаса цӏалдохъабазе кучӏдулги цӏалана.
«Жакъа аваразул маданияталъул хӏакъалъулъ бицунеб къоялъ тӏоцебесеб иргаялда нилъерго миллаталъул кьучӏлъун кколеб рахьдал мацӏ цӏуниялъул бицине бокьун буго. Рахьдал мацӏ лъаларев чиясул букӏунаро миллатги, лъаларо гьесда жиндирго халкъалъул маданиятги адабиятги. Миллаталъул мацӏ лъазабизе ва цӏунизе байбихьизе ккола нилъерго рокъоса, школалдайин абуни рокъоб малъараб щула гьабула. Нилъерго халкъалъул шагӏирзабаздаса, хъвадарухъабаздаса, бахӏарзаздаса чӏухӏизе ккола. Магӏарул мацӏалда асарал хъварав, дунялалдаго цӏар арав Расул Хӏамзатовасдаса чӏухӏичӏого кин рукӏинел. Гьесул «Къункърабазе» памятник лъечӏеб цогӏаги пачалихъ батиларо дунялалда», — ян абуна гьелъ гьитӏичаздехун.
П. СУЛТӏАНМУХӏАМАДОВА