Анкьил хӏасилал
ДРялъул бетӏерасул ишал тӏуралев Владимир Васильев дандчӏвана Россиялъул оборонаялъул министрасул заместитель Тимур Ивановгун
Данделъиялда гӏахьаллъана Россиялъул Оборонаялъул министерствоялъул департаменталъул директор Михаил Сапунов, Югалъулаб рагъул округалъул аскаразул бетӏерасул заместитель Мухӏамад Хандаев, Каспийскалъул флотилиялъул бетӏерасул заместитель Александр Прохоров, ДРялъул хӏукуматалъул председатель Артем Здунов, экономикаялъул министр Гӏусман Хасбулатов, вице-премьерасул ишал тӏуралев Рамазан Жафаров, сахлъицӏуниялъул министр Жамалудин Хӏажиибрагьимов.
Данделъи рагьулаго, Владимир Васильевас ракӏалдещвезабуна Россиялъул президентасулги 1999 соналда рагъулал лъугьа-бахъиназул гӏахьалчагӏазулги букӏараб дандчӏвай.
Хадуб Дагъистаналъул бетӏерас ва Тимур Ивановас дандрана рагъулал хъулухъчагӏазул лъимал гьез хъулухъ гьабулеб бакӏалда ругел школазде ва ясли-ахазде росизе ва гьезул руччаби хӏалтӏудалъун хьезаризе ккеялъул суалал.
Гьединго гьоркьоб лъун букӏана Болъихъ бугеб ясли-ахги школаги бакӏалъулаб администрациялъул къайимлъиялде кьезе ккеялъул ва Каспийскалъул флотилиялда рагъулаб хъулухъалда ругезе жанир чӏезе минаби разе ккеялъул масъалабиги.
Кватӏичӏого Каспийскалда байбихьизе буго цӏиял бакӏал разе. Гьездаго гьоркьор разе руго хӏухьбахъиялъул ва рекӏелгъеялъул централги гумул чӏолел ва гидротехникиял бакӏалги.
Шамай Хъазанбиева