Бербалагьи хисун буго
Экзаменал кьолелъул гӏадлу хвезабуразе гьабизе буго кьварараб тамихӏ
23 маялда Дагъистаналъул бетӏерасул ишал тӏуралев Владимир Васильевас ва лъайкьеялдаги гӏелмуялдаги хадуб халкколеб федералияб хъулухъалъул нухмалъулесул заместитель Анзор Мусаевас тӏобитӏараб данделъиялда бицана ГИАялде хӏадурлъиялъул хӏакъалъулъ.
Республикаялда ЕГЭ кьеялда хадуб халкколеб буго Рособрнадзоралъул, РФялъул УФСБялъул, прокуратураялъул, МВДялъул хӏалтӏухъабаз, Халкъияб Собраниялъул депутатаз. Жакъа нилъеда бихьулеб буго цӏалдохъабазулги гьезул эбел-инсулги ЕГЭялдехун бугеб бербалагьи хисун букӏин. 2014 соналда, масала, гӏурус мацӏалъул экзамен кьезе кӏвечӏо яги цӏакъго гӏодерегӏанал баллал щвана цӏалдохъабазул 66 проценталъе, гъоркьисалайин абуни, гьединазул къадар дагьлъана 36,6 проценталде щвезегӏан. 2017 соналда экзаменазе нусго балл щвана 16 выпускникасе.
Исана Дагъистаналдаса лъабго цӏалдохъан вахъана Тӏолгороссиялъул олимпиадабазул призераллъун. 2017 соналда экзаменал кьолаго, гьезул низам хвезабураб 526 хӏужа ккана республикаялда. Гьелдеги цӏикӏкӏараб кӏвар кьезе ккелин Лъайкьеялъул министерствоялъилан абуна республикаялъул нухмалъулес. Гьединго гьес районазул ва шагьаразул бутӏрузда тӏадкъана экзаменал гӏуцӏадго иналда хадуб халкквезе.
Анзор Мусаевас бицана, экзаменал тӏоритӏулеб куцалда хадуб халкквезе, жамгӏиял халкколел хӏисабалда, Дагъистаналде улкаялъул цогидал регионаздаса 12 студент вачӏине вукӏиналъул.