Махӏачхъалаялда, “Европа” залалда, тӏобитӏана лъималазе сайгъат гьабураб “Лъикӏлъиялъул гъамас” абураб тадбир. Гьелда гӏахьаллъи гьабуна батӏи-батӏиял районаздаса, шагьараздаса бесдаллъималаз ва Сириялдаги Гӏиракъалдаги эбел-эмен хутӏарал лъималаз.
Гьеб тӏобитӏизе квербакъана ДР ялъул гражданияб жамагӏат це бетӏезабиялъул советалъ. Лъималазе байрам тӏобитӏиялъулъ гӏахьаллъи гьабуна “Инсан” фондалъ ва “Бесдалал гьечӏеб Дагъистан” гӏуцӏиялъ. Гӏарцулал сурсатаздалъун квербакъи гьабуна ДРялъул нотариусазул советалъ, ДРялъул нотариалияб палатаялъул президент Шамсудин Жалаевас ва гӏадатиял гӏадамаз.
Тадбир нухда бачана Раисат Гӏусмановалъ. Лъималазда байрам баркана Зайнаб Махаевалъ, Зульфияца, Хадижат Ибрагьимовалъ, “Шунудагъ” ва “Махӏачхъала” лъималазул кьурдул ансамбляз. Гьаруна батӏи-батӏиял хӏаял, къецал, викторинаби. Жигараб гӏахьаллъи гьабуразе “Лъикӏлъиялъул гъансиниса” кьуна сайгъаталги.
Амма бищунго аслияб, киналго лъимал паналъизарураб сайгъат гӏуцӏарухъабаз хӏадурун тун букӏана тадбиралъул ахиралда гьабизе: кьер-кьерал машинабаздаги рекӏинарун, лъимал рачана шагьа- ралъул къватӏахъ свери бахъизе.
М. МАНАПОВ