Хунзахъ районалъул администрациялда тӏобитӏана ДРялъул Жамгӏияб палатаялъул Советалъул данделъи. Гьелда гӏахьаллъана республикаялъул Жамгӏияб палатаялъул Председатель Гӏабдулмуъмин Ибрагьимов, палатаялъул батӏиял-батӏиял комиссиязул председателал, гьезул заместителал ва цогидалги членалгун экспертал, микьго мугӏрузул районазул Жамгӏиял палатабазул председателал, Хунзахъ районалъул нухмалъулел ва цогидал. Аслияб къагӏидаялда данделъиялда гьоркьоб лъун букӏана мугӏрузул районазул социалиябгун-экономикияб цебетӏеялъул ва гьел районазда туризм цебетӏеялъул суалал. Гьедин “Мугӏрузулал территориязул социалиябгун-экономикияб цебетӏей” абураб ДРялъул Пачалихъияб программа гӏумруялде бахъинабиялда хурхараб докладгун цеве вахъана Жамгӏияб палатаялъул АПКялъулгун экологиялъул комиссиялъул председатель Гӏабдурахӏман Чураев. Гьес гӏатӏидго бицана рехсараб програмаялда рекъон мугӏрузул районал церетӏеялъе риччалел ругел сурсатазул ва гьел хӏалтӏизарулаго дандчӏвалел захӏмалъабазул.
Мугӏрузул районазда туризм цебетӏеялъул ва гьелдалъун халкъалъе жеги пайда цӏикӏкӏине ккани тӏагӏинаризе кколел гӏунгутӏабазул бицана Жамгӏияб палатаялъул лъай кьеялъулгун, культураялъул, спорталъул ва гӏолилазул политикаялъул комиссиялъул председателасул заместитель Хъайтмаз Дибировас.
Хунзахъ райадминистрациялъул гӏолилазул ишазул, туризмалъул ва спорталъул рахъалъ отделалъул начальник Шамай Гӏумаровалъ бицана муниципалитеталда туризмалда сверухъ бугеб ахӏвал-хӏалалъул ва гьеб цебетӏезаби мурадгун районалъул нухмалъиялъ гьабулеб бугеб хӏалтӏул. Гьелъул рагӏабазда рекъон 2021 соналъ районалде вачӏун вуго 190 азарго турист.
Гьединго цогидал кӏалъаял гьаруразулги пикраби руссарал рукӏана Дагъистаналъул росаби чӏунтичӏого рукӏине ккани, гьенир гӏадамазе, хасго гӏолилазе хӏажатал шартӏал ва хӏалтӏул бакӏал чӏезариялда хурхун гьабулеб хӏалтӏи цӏикӏкӏинабизе ккеялде. Хунзахъ районалъул бетӏер Нурмухӏамад Задиевас абуна туризм цебетӏезабиялде руссарал программаби гӏемер ругин. Амма батӏи-батӏиял гӏиллабаздалъун жакъа гьел программабазда гъорлъ гӏахьаллъиги гьабун, пачалихъалъ гьабулеб кумек къабул гьабизе гӏемерисел хӏадурун гьечӏин. Данделъиялъул ахиралда цо-цо гьелъул гӏахьалчагӏаз кьуна жидерго суалалги.