Дунги, гӏолохъанав магӏарул поэт,
Рикӏкӏаде воржине хӏинкъун вукӏана,
Хӏал лъалареб барти лъалхъилин хӏинкъун,
Хӏалихьатав гьудул велъилин абун.
Хӏ. ГЪАЗИМИРЗАЕВ
Араб анкьалда Махӏачхъалаялда Р. Хӏамзатовасул цӏаралда бугеб миллияб библиотекаялда тӏобитӏана машгьурав шагӏир Хӏажи Гъазимирзаев гьавуралдаса 95 сон тӏубаялъе сайгъат гьабураб тадбир.
Иргадулаб нухалдаги данделъана магӏарулал миллияб адабияталъул гъасде. Гьаб нухалда – жиндир гӏемерисел кучӏдул сариназде сверарав Хӏажил шигӏрияб дунялалде. Гьекъон къеч хьваларел гьесул шигӏрабазул иццул гьацӏул тӏагӏамалъул лъим цоги нухалда гьекъезе.
Дандеруссин байбихьана «Рилълъа, ясал, магӏарде» абураб махсародул кочӏодасан. Цинги киназго цадахъ ахӏана «Мугӏрул вехьасул кечӏги».
— Бокьулеб мугӏрул халкъ, нужер божелгун
Дун кочӏол ралъдалъе гъорлъе лъугьина.
Гъанкъулев вугони, данде квер бегье,
Рагӏалда вихьани, гъорлъегӏан рехе.
Амма шагӏирас шигӏрияб ахикь чӏараб тӏоцебесеб гъотӏол пихъ цӏакъго тӏагӏамлъана халкъалъе. Гьеб гъветӏалъ кьалбал риччана магӏарулазул пикрабазулъе. Жакъаги гьалделеб буго Хӏажил шигӏрияб улка. Гьенире гьоболлъи бана магӏарул машгьурал кочӏохъабаз, гьез ирсалъе кьуна магӏарул жакъасел кочӏохъабазухъеги Хӏажил кочӏоде бугеб хӏасратаб рокьи.
Кӏалъазе рахъарал Шамил Мухӏидиновас, Мухӏамад Мухӏамадовас, Гӏайшат Гӏалиевалъ, Гӏайшат Малачиевалъ, Париза Гереевалъ, Баху Мухӏидиновалъ, Закария-хӏажи Хамаговас бицана жидеего Хӏажил асараз гьабулеб асаралъул хӏакъалъулъ. Цӏалана гьесул кучӏдул.
Тадбиралде рачӏаразги кӏудияб гӏахьаллъи гьабуна. Щивасе бокьун букӏана шагӏирасул кучӏдул цӏализе ва жидерго гьесул шигӏрабазде бугеб рокьи загьир гьабизе.
Кучӏдул цӏалана газеталъул хӏалтӏухъаби Ашахан Юсуповас, Мухӏамад Манаповас, шагӏирзаби Тӏагьират Жаватхановалъ, Рукъият Асадулаевалъ, Гӏарада гьоркьохъеб школалъул цӏалдохъабаз ва гьелгун цадахъ байрамалде ячӏун йикӏарай гьеб школалъул учитель Асият Хӏусеновалъ ва цогидалги гьалбадерица.
Дандеруссиналъе хасаб берцинлъи кьун букӏана Гъазимирзаевасул рагӏабазда кучӏдул ахӏарал Чаран Султӏанбеговасул, Хӏажи Ахӏмадовасул, Даку Хӏажиевасул, Ахӏсарат Хӏайбулаевалъул, Умакусум Мухӏамадовазул церерахъиназ.
Гьединго дандеруссиналда гӏахьаллъизе ячӏун йикӏана Хунзахъ районалъул лъай кьеялъул управ- лениялъул начальник Патӏимат Хӏамзатоваги.
Данделъиялъул байбихьуда Хӏажи Гъазимирзаевасул гӏумруялъул ва творчествоялъул хӏакъалъулъ къокъаб баян кьуна библиотекаялъул гӏагараб ракь лъазабиялъул отделалъул нухмалъулей Патӏимат Муртазагӏалиевалъ.
Гьебго отделалъул хӏалтӏухъан Патӏимат Хӏажиевалъ гӏуцӏун букӏана шагӏирасул тӏахьазул ва гьесул асарал рахъарал журналал-газетазул выставкаги.
Лъугӏана Хӏажи Гъазимирзаевасул шигӏрабазе сайгъат гьабураб гьитӏинабго байрам. Амма абадиялъ лъугӏизе гьечӏо киназего вокьулев шагӏирасул кочӏол чвахи.
— Поэтал мехтула рокьул мехтелалъ,
Улкаялде бугеб гучаб гӏищкъуялъ,
Тӏолабго дунялги гьаб махлукъатги
Каранде бачине бугеб хӏасраталъ…
Авар поэзиялъул зодихъ цӏумлъун буго жакъаги Хӏажи Гӏазимирзаевасул шигӏру.