11 августалда ДРялъул хӏукуматалъул нухмалъулев Гӏабдулмуслим Гӏабдулмуслимовас тӏобитӏана республикаялда COVID-19 тӏибитӏизе биччангутӏиялда тӏад хӏалтӏи гьабулеб оперативияб штабалъул данделъи.
Гӏ. Гӏабдулмуслимовасул рагӏабазда рекъон, ахираб кӏиго анкьалда жаниб коронавирусалъул цӏияб инфекциялъ унтаразул ва стационарияб къагӏидаялъ сах гьаризе кколезул къадар цӏикӏкӏунеб буго.
Гьелде республикаялда бугеб хӏадурлъиялъул суал борхидал, премьер-министрас бицана гьабсагӏаталда больницабазда коронавирусалъ унтаразе хас гьабун 173 койка хӏадурун бугин.
Гьединго ДРялъул хӏукуматалъул нухмалъулес абуна унти бахун бугищали халгьабизе, гӏадамаз тестал кьезе ккелиланги.
60 соналдаса цӏикӏкӏараб ригьалъул, хроническиял унтаби ругел ва коронавирусалде данде прививка гьабун букӏинчӏел гӏадамаз жамагӏат бакӏарарал бакӏазда маскаби разе ккелин абуна ДРялъул Роспотребнадзоралъул управлениялъул нухмалъулесул ишал тӏуралей Раисат Арбухановалъ.
Оперативияб штабалъул данделъиялъул ахиралда хӏукму гьабуна гӏемер гӏадамал ракӏарараб бакӏалда маскаби раян ва гӏуцӏабазул нухмалъулез жидерго гӏуцӏабазда гьел рай тӏалаб гьабеян ва дезинфекциялъул низам цӏунеян малъа-хъваял гьаризе.