23 августалда тӏобитӏана ДРялъул лъай кьеялъул хӏалтӏухъабазул августалъулаб данделъи. Гьенив гӏахьаллъана ДРялъул хӏукуматалъул нухмалъулев Гӏабдулмуслим Гӏабдулмуслимовги.
Данделъи рагьулаго, Гӏ. Гӏабдулмуслимовас абуна ДРялъул бетӏерас исана республикаялда лъай кьеялъул сонлъун лъазабун букӏиналъ гьарулел тадбиразги хӏалтӏабазги Дагъистаналда лъай кьеялъул иш борхизабиялъе кӏудияб квербакъи гьабулеб бугин.
Республикаялда лъималазул цӏалудехунги лъай тӏалаб гьабиялдехунги гъира бижизабиялъе шартӏал чӏезаризе ккелинги абуна ДРялъул хӏукуматалъул нухмалъулес.
«Гьеб мурадалда, гъоркьисаялдаса нахъе Тӏолгороссиялъул школлъималазул олимпиадаялда бакӏал ккуразеги, гьезул мугӏалимзабазеги, гьединго ЕГЭялда 100 балл босарал выпускниказеги 100 азарго гъурущ премия кьолеб буго. Исана гьеб премиялъе мустахӏикълъана 30 цӏалдохъанги 3 учительги».
Жакъа къоялда республикаялда 40 азаргогӏан цӏалдохъанасе бакӏ букӏунеб хӏалалъ 103 цӏияб школаги, микьазарго лъимер жаниб хӏебтӏулеб 56 ясли-ахги балеб буго.
1 сентябралда цӏияб 4 школаги 15 ясли-ахги рагьизе буго.
ДРялъул лъай кьеялъул министр Яхӏя Бучаевас бицана, лъай кьеялда хурхарал хӏалтӏаби гӏумруялде рахъинаризе 2021 соналъ 54,3 млрд биччан букӏараб батани, исана гьелъул къадар 22% цӏикӏкӏанин — 66,2 млрд бихьизабун бугин. Гьелда гьоркьоса 11 млрд биччалеб буго «Демография» ва «Лъай кьей» нацпроектазе.
М. Манапов