Малла Насрудинидаги цо пуланав чиясдаги
гьоркьоб цо щибго гуреб жоялдасан дагӏба-рагӏи
кканила. Ахиралдаги дагӏбадулас Малла Насру-
динида зар кьабунила. Гьебсагӏаталдаго гьоркьоре масли-
гӏаталъе чагӏиги речӏчӏун, Малла Насрудинихъе кьабизеги
щвечӏого, гьел ратӏа гьарунила.
Жинда кьабураб зарги цӏакъ захӏмалъун, Малла Насру-
диница гъов дандияв диваналде кьунила.
Цо пуланаб къоялъ диванбегас гьел кӏиялго ахӏанила
ва гьезда гьоркьоб ккараб жо цӏеханила.
Малла Насрудиница абунила:
– Гьас дир магӏарзукъалазулъ зар кьабуна. Гьединлъи-
дал гьасдаса кколеб мухь дие бахъун кьеян гьарула дица
дуда, – ян.
Гъов Малла Насрудинида зар кьабурав чи диванбегил
гьудул вукӏанила, гьединлъидал диванбегие бокьанила
гъов хвасар гьавизе. Гьес абунила цохӏо нухалда кьабураб
заруда тӏасалъугьун тезе бегьуларищан. Малла Насрудин
разилъичӏила. Гьебмехалъ диванбегица абунила:
– Гьедин батани, гьасдасан дуе цо гӏабаси гӏарац ккола,
– ян.
Гъов чияс жиндихъ гӏарац гьечӏин, гьеб босизе, рокъове
виччаян абунила.
Диванбегицаги гьев рокъове виччанила ва тӏокӏав гьа-
нивеги вачӏунгеян абураб жо бичӏчӏизабунила.
Гӏарац босизе арав чи вачӏинегӏан Малла Насрудин ба-
лагьанила цо сагӏаталъ, кӏиго сагӏаталъ. Ахиралдаги
гьесда бичӏчӏанила дов чи гьениве тӏадвуссун тӏокӏав вачӏу-
наревлъи. Диванбегица жиндие гьабураб жоги бичӏчӏун,
Малла Насрудиница гьесда гьикъанила:
– Бетӏерчӏахъаяв диванбег, къануналда рекъон, магӏар —
зукъалазулъ зар кьабурав чиясдаса цо гӏабасийищха кко-
леб? – ан.
– У, – ян жаваб кьунила диванбегица.
Лъикӏго сверизеги гьабун, диванбегил магӏарзукъала-
зулъ зар щвезабунила Малла Насрудиница ва цинги гьесда
абунила:
– Дов, гӏабаси босизе рокъове арав чи вачӏинегӏан гьа-
нив чӏезе дир заман гьечӏо. Дов вачӏараб мехалда, доб дие
кколеб гӏабаси дуего босе, – ян.