Лъимер сахлъизегӏан лъедаса цӏунизе ккола
Риидалил заманалда рахунел цо-цо инфекцияз, хаслихъеги тӏагӏам бахъи гьабичӏого толаро. Риидал ралъдахъа, чорокаб бакӏалдаса, яги хӏутӏаз хӏанчӏун, стрептодермия бахаразул къадар цӏикӏкӏун букӏана шагьаразда. Цӏуна-къай гьабичӏони, риидал унтун рукӏараздецин цӏидасанги бахине рес буго гьебго унти. Стрептодермия ккола тӏомол унти, гьеб бахуна бокьарав чиясде. Амма гӏемерисеб мехалда лъимал унтула. Махӏачхъалаялъул лъималазул щуабилеб поликлиникаялъул педиатр Патӏимат Мухӏамадовалъ бицана стрептодермия жеги тӏагӏун гьечӏин. Хасго лъимал школалде ва ясли-ахазде хьвадизе байбихьаралдаса нахъе, гьеб унти бугезул къадар цӏидасан цӏикӏкӏине лъугьанилан.
Нилъ сабаблъун чияр лъималазде унти бахине тоге
Цо-цо улбуз стрептодермия унтудаса сахлъанинги ккун, лъимал школалде ритӏула. Амма, эбел-инсул кӏвар гьечӏолъи сабаблъун, цо-кӏиго анкьидасан цогидал лъималаздеги бахунеб буго гьебго унти. Гьединлъидал, эбел-инсуца жидерго лъимал школалде ритӏулелъул, чияр лъималазулги пикру гьабизе ккола. Нилъерго лъимал сабаблъун чияр лъималги унтизарун, гьезул цӏали хвезабизе бегьуларо. Лъимадул тӏомодаса стрептодермиялъул чанхъ нахъе ун батаниги, гьеб бахунеб унтул инкубациялъулаб заман букӏуна 21 къо. Гьеб заман инегӏан, унтул хутӏел чорхолъго букӏуна. Гьединлъидал тохтурзабазул изну гьечӏого ва инкубациялъулаб заман лъугӏидал гурони лъимер школалде битӏизе бегьуларо.
Стрептодермия лъималазде хехго бахуна. Гьединлъидал дунял багӏарараб заманалда лъимадул лъикӏ халгьабизе ккола, гьелъул тӏомода гьитӏинабгӏаги гӏуж яги ругъун лъугьун батани, гьелда тӏад зеленка ва инфекциял чӏвалеб цогидаб дарман бахине ккола. Тӏомода лъугьараб бокьараб ругънадаса яги кӏкӏараялъ хӏанчӏараб бакӏалдаса стрептодермия яги цогидаб тӏомол унти хехго бахуна лъималазде.
Стрептодермия бахунеб къагӏида:
* унтаравгун цадахъ ругони;
* унтарав чиясухъ букӏараб тӏагӏелалда квер хъвани;
* инфекция бахине бегьула хӏурудалъунги;
* кӏкӏарабазгун цогидал рухӏчӏаголъабаз хӏанчӏани;
* рацӏцӏалъи цӏунулеб гьечӏони;
* тункун яги хъарсун, тӏомода гӏужал лъугьун ругони;
* чакрил унти яги кьаралъи бугони;
* бидул пулазда хурхараб унти бугони;
* сунда букӏаниги ракӏбакъван, нерваби хун ругони;
* чорхолъ витаминал гӏолел гьечӏони;
* иммунитет загӏиплъун бугони;
* тӏомол цогидаб унти бугони;
* черх лъикӏ багӏаризабун, хадуб цӏорозе гьабулеб бугони;
* хъалиян цӏалеб, наркотикал яги гӏаракъи хӏалтӏизабулеб бугони.
Щайха риидал лъугьунеб?
Гӏадамазда бищунго цӏикӏкӏун гӏетӏ балеб заман ккола рии. Гӏемер гӏетӏ балев чиясул потница (гӏетӏул унти) лъугьине бегьула, тӏомоде тӏаде бараб жоялъул гӏисинаб чанхъги лъугьуна. Гьел гӏисинал гӏужазде стрептококкалъул бактерия ккани, гӏетӏгун жубан, стрептодермия унти хехго лъугьуна.
Стрептодермия унти бахарав чиясул тӏом бакъвараб гӏадин лъугьуна. Цо-цоккун раккула багӏарал гургинал тӏанкӏал. Цо яги чанго кӏудиял къучӏби лъугьинеги бегьула. Гьелдаса хадуб гьел рукарула ва унтула, цӏа-кан бахуна. Тӏомода лъугьарал гьорорал къучӏбузда аскӏор лимфоузлаби кӏодолъизе бегьула.
Стрептодермия байбихьудаго ветрянкаялда релълъараб букӏине бегьула. Ветрянка бугони, тӏомода лъугьарал къучӏбузулъ хьверд букӏуна, ва гьел, квер хъваницин, бигьаго рихъун уна. Стрептодермия бугони, тӏомода лъугьарал къучӏби къвакӏарал рукӏуна.
Стрептодермиялъул бактерияз лъугьинаризе бегьула бронхит, ангина, пневмония, менингит, скарлатина ва цогидалги унтаби.
Гӏемерисел тӏомол унтаби стрептококкалъул бактерияздалъун лъугьарал рукӏуна.
Статистикаялъул баяназда рекъон, щибаб 50-абилеб лъимер стрептодермиялъ унтула.
Стрептодермия лъугьине бегьула кӏиго батӏияб къагӏидаялдалъун: тӏоцебесеб къагӏидаялъул стрептодермия лъугьуна тӏомода лъураб гӏужалда тӏаде стрептококкалъул бактерия ккун. Кӏиабилеб къагӏидаялъул стрептодермия лъугьуна ветрянка, экзема, герпесалъул вирус ва цогидалги тӏомол рахунел унтаби ругони.
Стрептодермиялъе цӏакъ бокьула лъим. Гьединлъидал риидал, гӏадамазда гӏетӏ балеб заманалда, гьеб унти хехго тӏибитӏула. Гӏемерисеб мехалда унти лъималазде бахуна, щайгурелъул гьезул иммунитет загӏипаб букӏунелъул. Гьитӏинал лъималазул гьурмада, ай кӏалалда сверун ва мегӏералда гъоркь лъугьуна стрептококкалъул къучӏби. Дагь-дагьккун гьел къучӏби рукӏараб бакӏалда тӏогьилаб чанхъги чӏвала. Кӏал ва мегӏер чвахулел лъималазул гьеб унти сахгьабизе захӏмалъула. Стрептодермия тӏибитӏичӏого букӏинелъун тӏомода лъим хъвазе бегьуларо, гьединлъидал ахирисеб чанхъ бортизегӏан лъимер чвердезабизе гьукъула тохтурзабаз. Чороклъун бугони, полотенцаялъ бацӏцӏине ккола. Стрептодермия цӏакъ букаризабулеб унти буго. Букарараб бакӏ хъасани, стрептококкалъул бактериял цереса цере уна.
Патӏимат Султӏанмухӏамадова