Щулаго къай рачел
РФялъул Лъайкьеялъул министерствоялъул сайталда лъун буго исана кьезе ругел пачалихъиял экзаменазул расписание
Пачалихъиял экзаменал байбихьизе руго 27 маялда ва ахирисеб букӏине буго тӏоцебесеб июлалда. Амма гьеб заманалда экзамен кьун бажаричӏел цӏалдохъабазе рес кьолеб буго цогидал къоязда гьел кьезе. Гьел къоялги ккола 17 июналдаса тӏоцебесеб июлалде щвезегӏан.
ЕГЭялъул аслияб бутӏаялда экзаменал кьезе руго исана школаги колледжгун техникум (гьоркьохъеб махщалил лъайкьеялъул идара) лъугӏулел цӏалдохъабазги цересел соназда экзамен кьун бажаричӏел яги щварал хӏасилаздаса рази гьечӏел цӏалдохъабазги. Экзамен кьезе рес буго къватӏисел улкабазда лъайкьеялъул идара лъугӏизабурал гӏолилазеги.
Аслияб бутӏаялъул расписание
27 май, итни: география, литература.
29 май, талат: математика (базовиябги профилиябги даража).
31 май, рузманкъо: история, химия.
3 июнь, итни: гӏурус мацӏ.
5 июнь, талат: къватӏисел улкабазул мацӏал (хъвавул бутӏа), физика.
7 июнь, рузманкъо: къватӏисел улкабазул мацӏал (кӏалзул бутӏа).
8 июнь, шамат: къватӏисел улкабазул мацӏал (кӏалзул бутӏа).
10 июнь, итни: обществознание.
13 июнь, хамиз: биология, информатика ва ИКТ.
Нахъраталил къоязул расписание
Батӏи-батӏияб гӏилла сабаблъун, аслияб заманалда ЕГЭ кьезе рес ккечӏел цӏалдохъабаз экзаменал кьезе руго цогидаб мехалда. Масала, экзамен кьолеб къоялда унтун вукӏун ватани, цӏалдохъанас бихьизабизе ккола тохтурас кьураб кагъат (справка).
Рехсараб заманалда экзамен кьезе ихтияр кьола чарагьечӏого, ай аттестат щвезе ккани, кьолел экзаменазухъ кӏийилаб къимат щварал цӏалдохъабазеги. Гьединаллъун ккола гӏурус мацӏалъулги математикаялъул базовиябги экзаменал. Гьел экзаменазда бищун дагьаблъун чӏезабураб баллниги щвечӏони, аттестаталдаса махӏрумлъула.
Гьелго къоязда экзамен кьезе буго тӏасарищарал экзаменал цадахъ ккарал цӏалдохъабазги. Масала, биологиялъулги информатикаялъулги экзамен тӏасабищарав цӏалдохъанасухъа кӏиябго кьун бажариларо, гьел цо къоялъ рукӏиналда бан. Гьединлъидал цо экзамен кьезе буго аслияб заманалда, кӏиабилеб – цогидаб къоялъ. Тӏасабищараб экзаменалъухъ лъикӏал баллал щвечӏони, гьеб кӏиабизеги кьезе ихтияр щола гӏицӏго тӏасияб соналда.
17 июнь, итни: география ва литература.
18 июнь, талат: история ва физика.
20 июнь, хамиз: биология, информатика ва ИКТ, химия.
24 июнь, итни: базовиябги профилиябги даражаялъул математика.
26 июнь, талат: гӏурус мацӏ.
27 июнь, хамиз: къватӏисел улкабазул мацӏал (кӏалзул бутӏа).
28 июнь, рузманкъо: обществознание ва къватӏисел улкабазул мацӏал (хъвавул бутӏа).
1 июль, итни: киналго экзаменазул нахъраталил къо.
Цоги нухалда кьеялъул заман
Сентябралдаги рес буго ЕГЭ кьезе. Гьелъие ихтияр кьола гӏурус мацӏалъулги базовияб даражаялъул математикаялъулги экзаменазухъ чӏезабураб бищун дагьаб балл щвечӏел цӏалдохъабазе.
3 сентябрь, талат: гӏурус мацӏалъул пересдача.
6 сентябрь, рузманкъо: базовияб даражаялъул математикаялъул пересдача.
20 сентябрь, рузманкъо: базовияб даражаялъул математикаялъулги гӏурус мацӏалъулги пересдача.