Хӏалтӏизе байбихьана «Росдал (земский) учитель» абураб проект
ДРялъул Лъайкьеялъул ва гӏелмуялъул министерствоялда къабул гьарулел руго проекталда гӏахьаллъизе гъирабарал учительзабазул хитӏабал. Проекталъул аслияб мурад буго гӏолохъанал учительзабазулъ гъирабазаби росабазул школазде хӏалтӏизе ине. Рехсараб проект гӏумруялде бахъинабиялъул рахъалъ Дагъистан буго церехъабазул кьерда. Гьабсагӏаталда республикаялъул росабазул школазе камун вуго 249 учитель.
Проекталда рекъон, росдал школалда хӏалтӏизе унев гӏолохъанав учителасе кьезе буго цо миллион гъуруш. Гьеб гӏарцухъ босизе (яги базе), яги къачӏазе, ялъуни бегьула хӏалтӏизе тӏасабищараб росулъ мина.
Исана 50 чиясул рес буго проекталда гӏахьаллъизе. Росулъ хӏалтӏизе ине бегьула 50сонил ригьалде рахинчӏел учительзаби. Гьел хӏалтӏизеги ккола тӏасабищараб школалда щуго лъагӏелалъ.
Гьабсагӏаталда министерствоялъ хӏадурулеб буго учительзаби хӏажат ругел школазул сияхӏ. Росдал школалда хӏалтӏизе ине, ай проекталда гӏахьаллъизе бокьарав учителас хитӏаб гьабизе ккола министерствоялъул электронияб адресалде: [email protected]. Кагътида бихьизабизе ккола фамилия, цӏар ва инсул цӏар, хӏалтӏулеб бакӏ, лъайкьей ва гӏумру гьабулеб бакӏ. Суалалгун кӏалъазе бегьула гьаб телефоналде: 8 (8722) 67-84-71.
Хадижат Шапиева