Квалквал гьабуразе — уголовияб тамихӏ
6 августалдаса хӏалтӏизе байбихьана Россиялда хехаб кумекалъул машинаялъе нух биччачӏел яги тохтурзабазул хӏалтӏуе квалквал гьабурал гӏадамал уголовияб тамихӏалде цӏалел законал.
Хехаб кумекалъул машинаялъе нух биччачӏел водителазда гьанжелъизегӏан 500 гъурущ гӏакӏа къотӏулаан, гьанжеялдаса нахъеян абуни 5000 гъурущ гӏакӏа къотӏизе буго ва гьединго 3-12 моцӏалъ машина бачиналъул ихтияралдаса махӏрум гьаризе руго.
Нагагь хехаб кумекалъул машина цебехун биччачӏолъиялъ тохтурзабазул хӏалтӏуе квалквал ккун батани ва гьелдалъун унтарасул сахлъиялъе зарал ккани, машинаялъе нух биччачӏев водителасда 80000 гъурущ гӏакӏа къотӏизе ва гьединго кӏиго соналъ эркенлъиялдаса махӏрум гьавизе бихьизабун буго цӏияб законалда рекъон. Нагагь хехаб кумекалъул машинаялда вукӏарав кумек хӏажатав унтарав хвани, гьесие нух биччачӏев водитель ункъо соналъ колониялда туснахъ гьавизе рес буго.
Медицинаялъул хӏалтӏухъабазул сахлъиялъе зарал гьабуралъухъги гӏакӏа къотӏизе буго, зарал гьабурав кӏиго соналъ эркенлъиялдаса махӏрумлъизецин рес буго. Тохтурасе чӏвазе вугин хӏинкъи кьуралъухъ яги гьесул сахлъиялъе кӏудияб зарал гьабурав щуго соналъ туснахъ гьавизе бегьула.