Машгьураб мазь ва батӏи-батӏиял унтаби сахгьариялъе цӏиял къагӏидаби ургъарав хирург Александр Вишневский кколаан нилъер ракьцояв
Александр Вишневский гьавуралдаса 145 сон тӏубай кӏодоги гьабун ва Москваялда бугеб, ай гьесул цӏар кьураб хирургиялъул цӏех-рехалъулаб централъ 75 сон байги хӏисабалде босун, гьал къоязда Махӏачхъалаялда тӏобитӏана гӏелмияб конференция.
Гьелда гӏахьаллъи гьабуна РФялъул президентасул СКФОялда вугев вакиласул заместитель Игорь Рабковас, НМИЦалъул директор Амиран Ревишвилица ва Вишневскиясул тухумалдаса хирург Галина Вишневскаялъ.
Конференция тӏобитӏизе хӏаракат бахъана А. В. Вишневскиясул цӏаралда бугеб институталъул хӏалтӏухъан, медицинаялъул гӏелмабазул доктор, травматологиялъул ва ортопедиялъул отделениялъул заведующий Ахӏмадов Багьавудиница, гьединго рехсараб институталъул пластикияб хирургиялъул отделениялъул заведующая Наида Султӏановалъ.
Конференция рагьана республикаялъул клиникияб больницаялъул азбаралда А. В. Вишневскиясе бараб памятникалда цере тӏугьдул лъеялдасан. Гьеб тадбиралда гӏахьаллъи гьабуна ДРялъул хӏукуматалъул председателасул тӏоцевесев заместитель Анатолий Карибовас, Дагъистаналъул сахлъи цӏуниялъул министр Жамалудин Хӏажиибрагьимовас, Москваялдаса ва цогидал регионаздаса рачӏарал гьалбаз. Гьенив кӏалъазе вахъарав ДГМУялъул ректор Сулейман Маммаевас киназего баркалаги кьуна, заманги батун, Дагъистаналде рачӏаралъухъ.
Гьенисан киналго ана ДГМУялъул гӏелмиябгун лъайкьеялъул инновациялъулаб централде. Гьениве вачӏун вукӏана ДРялъул бетӏер Владимир Васильевги. Гьес бицана тохтурзабазулги гьезул захӏматаб хӏалтӏулги хӏакъалъулъ.
— Кин бугониги, дагъистаниял руго цебелъураб масъала тӏубалел ва жидерго хӏалтӏи ракӏбацӏцӏадго гьабулел гӏадамал. Гьеб нилъеда бихьизеги бихьула. Цогидал бутӏабазда хӏалтӏулел дагъистаниязеги хасиятаб буго бергьенлъаби росизе гъира букӏин, — абун бицана Дагъистаналъул бетӏерас.
ДРялъул сахлъи цӏуниялъул министр Жамалудин Хӏажиибрагьимовас бицана Александр Вишневскиясул гӏумруялъулги гьес ракьалда тараб лъалкӏалъулги хӏакъалъулъ.
А. Вишневскиясул лъикӏлъи дагъистанияздаги кӏочон гьечӏо. Гьесул цӏаралда музей хӏалтӏулеб буго тохтурас гӏумру гьабулеб букӏараб Чирюрталда. Конференциялде рачӏарал гьалбал щвана гьениреги ва бихьана гьес гӏумру гьабулеб букӏараб минаги, хӏалтӏизарулел рукӏарал алаталги.
Патӏимат Расулова