РФялъул президент Владимир Путинил Указалда рекъон, Гьудуллъиялъул орден кьуна ДРялъул муфти, шайих Ахӏмад-хӏажи-афандие.
Дагъистаналъул гӏалимзабазул Советалъул председатель гьеб шапакъаталъе мустахӏикълъана рухӏиялгун культуриял гӏадатал цӏунаралъухъ ва церетӏезаруралъухъ, гьединго халкъазда гьоркьоб гьудуллъи-вацлъи щула гьабиялъул мурадалда гьабулеб бугеб хӏалтӏухъ.
Гьал къоязда Дагъистаналъул бетӏер Владимир Васильевас тӏобитӏараб данделъиялда, муфтиясул каранда гьеб орденги бан, регионалъул нухмалъулес абуна:
«Нилъер республикаялда гӏумру гьабулеб буго батӏи-батӏиял миллатазул ва батӏи-батӏиял диназул вакилзабаз. Гьезда гьоркьоб унго-унгояб гьудуллъи букӏинабиялъеги гьеб цӏуниялъеги гӏемераб хӏалтӏи гьабулеб буго диниял идарабазги гьезул церехъабазги. Гьеб гьедин букӏин нилъеда бихьана Дагъистаналъе ва гӏаммаб къагӏидаялъ Россиялъего рукӏарал захӏматал соназда. 20 соналъ цебе республикаялде рачӏун рукӏарал «ахӏичӏел гьалбадерие» мустахӏикъаб къимат кьуна дагъистанияз. Гьелъул хӏакъалъулъ Дагъистаналде вачӏиндалги бицана улкаялъул президент Владимир Путиница ва республикаялъул муфти Ахӏмад-афандиеги ягьудиязул общинаялъул советалъул председатель Валерий Дибияевасеги Гьудуллъиялъул орден кьеялъул указалдаги гъоркь гъулбасана», — ян.
«Хӏакъикъат» газеталъул коллективалъ ракӏ-ракӏалъ баркула ДРялъул муфти, шайих Ахӏмад-хӏажи-афандиясда гьеб тӏадегӏанаб шапакъат, гьарула сахлъи ва хӏалтӏулъ бергьенлъаби.