Кризисилан цӏарги чӏван,
Цӏорон буго Россия,
Нефтедолларал дагьльун,
Дугъдан вуго Володя.
Евро эхеде ххарун,
Холеб буго гъурщил сси,
Сабурав Медведевцин
Магӏид вуго вецӏцӏулев.
Вуцӏцӏунги чӏун гьимулев,
Дамдамун хваяв Дональд,
Аб дуниял жидерин,
Жалги демократалин.
Дагьалги тӏаделъани,
Тӏомода лъелин Раша,
Лъикӏ санкцияз къакъани,
Кьоринив ккелин Иван.
Ина буго гьединан
Гьаб дунялалда дагӏба,
Донбасалда, Сириялъ
Ссур буго пулеб жакъа.
Амма сабру кӏудияв
Кӏиго чиновник вуго,
Чухъа ретӏун, чу кьолон,
Чабхъад ине хӏадурго.
Къварилъиялда хадуб
Гӏатӏилъи камуларин,
Чанги дефолт букӏанин,
Некӏого кӏочон танин.
Талихӏалъ, Путин вугин,
Петерпуталъул игит —
ИГИЛалда мал базе,
Тарампида квелъ базе.
Путинил рейтинг хвани,
Параяль гьевги хисун,
Дима ханлъун вачӏинин,
Хадубги роцӏцӏун инин.
Халкъалъги цӏидасанго
Ракӏбацӏцӏалъи цӏехелин,
Цӏадабе нарт пулезда
Пири ццидал речӏчӏилин.
Рамазанги вукӏинин
Лагълъи тӏагӏинабулев,
Тӏубараб къого соналъ
«Дедица» къачӏан кьураб.
Дагъистанги борчӏилин
Гъваридаб макьидаса —
Бокьухъе заман бугин,
Зурма пузе панаго.
Къокъаб калам, кинабго
Рукӏалиде бачӏинин —
Рамазанги Хизриги
Ханлъуда хутӏанани.
Хадурагӏи:
Рамазан Белый Домалъ
Довего вачун ана,
Дур миссия тӏубанин,
Тӏадчагӏи разилъанин.
Хизриги жанив гъечӏо,
Гъаримал вацал гӏадин,
Жакъаги кьерда вуго,
Гьечӏел михъалги кьурун!