• Дунял цӏакъ дагьаб жо буго, гьениб дур гӏумруги жеги цӏакъ дагьаб жо буго, гьеб гӏумруялъул дуе хутӏараб жо абуни цӏакъго цӏакъ дагьаб жо буго.
• Мун дунялалде машгъуллъуге, гьениб дуе гӏумруялъул нахъе хутӏараб жоялъул къадаралда гурого.
• Дуца Бетӏергьан Аллагьасе гӏибадат гьабе, Гьесде мун хӏажалъулевгӏан къадаралъ.
• Дуца ахираталъул гӏамал гьабе, гьенив чӏезе вугебгӏан къадаралъ.
• Жужахӏалъул цӏаялдаса хвасарлъулеб гӏамал гьабе, гьелдаса хвасарлъи дуда якъинго лъазегӏан.
• Мунагьал гьаре Аллагьасул гӏазабал хӏехьезе кӏолебгӏан къадаралъ.
• Аллагьасде гӏасилъун мунагь гьабизе къасд ккедал, дуца балагье гьеб мунагь гьабизе Аллагьасдаги Гьесул малаикзабаздаги бихьулареб бакӏ.
• Дуца дурго дунялги кьун ахират бичун босе – дуе дунялалдаги ахираталдаги хайир щвела.
• Дуца дурго ахираталъухъ дунял босуге, гьанивги доваги чӏового хутӏила.
• Бахиллъи, тӏабигӏат квешлъи ва гӏемер гӏадамазде хӏажалъи тӏалаб гьаби ахӏмакълъиялъул гӏаламатаздасан буго.
• Гӏузру бачун мун вацӏцӏардуге дур гӏузру бихьизе бокьичӏев чиясда цеве ва дуца дур хӏажат тӏубан, дур кверщел батизе бокьуларев чиясдаса кумек тӏалаб гьабуге.
• Адабалъул ва муруваталъул рахъалъ бищунго гӏадамазе лъикӏав чи вуго жив чияде хӏажалъидал нахъекъан чӏолев, амма жинде цогидав хӏажалъидал, гьесул хӏажат тӏубазе аскӏов чӏолев.
• Чияр хӏакъалъулъ дуда лъараб жо дуца бищунго лъикӏалде баче, гьесдаса тӏубараб хӏужа духъе щвезегӏан.
• Дуца гӏабдалзабаздехун магӏна гъваридаб калам гьабуге, гьез мун гьереси гьавизе гурин, гьединго гӏакъилал чагӏаздехун батӏулаб калам гьабуге, гьезул дудаго ццин бахъине гурин.
• Жиндихъ гӏенеккуларев чиясдехун кӏалъалев чи хваразухъе цӏа бакизе цӏул баччулев чиясда релълъун вуго.
• Дуца гӏелмуялъул агьлуялдаса гӏелму нахъчӏваге, дуе мунагь букӏуна, агьлу гурезухъе гьебги кьоге, мун гӏабдаллъун вукӏуна.
• Воре, мун цӏуне кӏвахӏаллъиялдаса ва чӏалгӏаде чӏвачӏвадиялдаса. Кӏвахӏаллъани, дуца дудаго тӏадаб иш тӏубаларо, чӏвачӏвадани, битӏараб жоялда сабру гьабизеги кӏоларо.
• Мун гӏемер мехалъ хӏажатханаялда гӏодов чӏоге, басур (геморрой) ккеялъе сабаблъила.
• Халатккун хӏажат тӏубаялъ тӏул багъаризабула ва басур унти ккезабула.
• Жинца гӏадамалги живгоги ращад гьарурав ритӏухъав чиясул Аллагьас хиралъи цӏикӏкӏинабула.
• Васасе инсул тамихӏ хуруе рак гӏадаб жо буго.
• Кӏалъалеб мехалъ дуца калам къокъ гьабе ва каламалдалъун мурад тӏубан хадуб каламги гьабуге.
• Дурго хӏалкӏолъи-бажариялъ чияда зулму-хӏал гьабиялде мун ахӏараб мехалъ, дуца ракӏалдещвезабе Аллагьасул дуда тӏад бугеб къуват. Аллагьасул гӏазаб кутакаб ва даимаб лъугӏел гьечӏеб буго.