Асхӏабгӏали Хӏасанов магӏарулазда лъала шагӏир, палугьан, кочӏохъан хӏисабалдаги Даку Асадулаевасул цӏаралда бугеб фондалъул нухмалъулев хӏисабалдаги.
Гьев ккола Дагъистаналъул Хъвадарухъабазул союзалъул членги. Гьес къватӏибе биччана микьго тӏехь. Дагьаб цебегӏан къватӏибе бачӏараб иргадулаб тӏехьалда цӏар буго «Рокьул чирахъ» абун. Тӏехь гӏуцӏун буго анлъго бутӏаялдаса. Шагӏирасул шигӏрабазул аслиял темабилъун ккола ватӏаналде рокьиги, умумузул бахӏарчияб тарихги, жакъасеб къоялъул къисматги, заманаялъ зурулеб бугеб гӏасруги.
Масала, имам Шамилил гьал жугьабаз дие гьабуна кӏудияб асар. Авторасул гъира-шавкъалъ черхалда сиригицин базабулеб буго:
— Гьале дунги щвана
гӏешдерил щобде,
Шамил, витӏе дунги
Щулалъул гохӏде.
Тушбаби гъуризе гъазаваталде,
Назму ахӏулаго,
ина – кье хвалчен.
Гьединабго асар гьабуна дие авторас рехсараб щуго рокьиялъги: Тӏадегӏанав Аллагьасде, эбел-инсуде, ватӏаналде, хъизамалде, лъималазде, лъикӏабщиналде…
— Рокьи гуреб дир рекӏелъ
киданиги тӏегьачӏо,
Гьениб жахӏда-цциналъе
хӏапа-роялъ кӏал бачӏо.
Лъикӏабщиналде рокьи
ралъад-гӏанги буго дилъ,
Даимлъигун бащадаб буго
гьеб щуго рокьи.
Биччанте гьаб цӏияб тӏехьги рокьул чирахълъун гвангъизе щивав цӏалдолесул ракӏазулъ.