2019 соналда 13000 хӏаким тамихӏалде цӏан вуго республикаялда. 2018 соналде дандеккун, 3000 чиясдалъун цӏикӏкӏанин гьеб сияхӏин абураб баян кьуна республикаялъул прокурор Алексей Ежовас информалатазе.
Гьеб гуребги, прокуратураялъухъа бажарун буго хӏалтӏухъабазе кьезе кколеб букӏараб 80 млн гъурщил налъи лъугӏизабизеги.
13000 хӏакимасе гӏадлу гьабун батани, кӏудияб къагӏида ккун бугилан абила газета цӏалулез. Амма щибха гьелъ кьураб?
Хутӏарал хӏакимзаби, гьеб дарсги бичӏчӏун, лъикӏ хӏалтӏизейищ лъугьарал?
Гьеб щакаб иш бугин бицана «Хӏакъикъаталъе» жамгӏияв хӏаракатчи Гӏисалмухӏамад Набиевас:
«10 ватаниги, 13000 ватаниги, хӏаким гӏадлуялде цӏанин абураб жоялъ хисизе жо бихьуларо дида. Тӏоцебесеб иргаялда абуни, бичӏчӏулеб гьечӏо гӏадлуялде цӏан ругин абураб жоялъул магӏна. Гӏакӏайищ гьезде къотӏараб, жамагӏаталъул хӏалтӏудейищ ритӏарал яги жанирищ тӏамурал?
Кӏиабизе, гьаб жанисеб система хисичӏого, цониги хӏакимги кантӏизе гьечӏо. Киналго гьел руго чванта киндай бечед гьабилаян пикруялда», — ян абуна жамгӏияв хӏаракатчияс.
Гьелдаго релълъараб пикру буго «Черновик» газеталъул политикияв обозреватель Мухӏамад Мухӏамадовасулги:
«Чамалиго хӏаким тамихӏалде цӏанин абураб хабар цо макъалаялъул бетӏер берцинлъиялъул мурадалда къватӏибе кьей гурони, гьелъ гьабин абун кьезе цӏияб жо дида бихьулеб гьечӏо. Тамихӏги букӏуна батӏи-батӏияб. Чӏванкъотӏун бичӏчӏулеб гьечӏо кинаб тамихӏ гьезие гьабурабали. Гьединго цониги гӏайиб ккарав хӏакимчиясул цӏарги рехсон гьечӏо гьениб. Цогидал хӏакимзабазе дарслъун букӏинищ гьебилан гьикъани, букӏинин абизе кӏоларо».