Россиялъул Генералияв прокурорлъун вукӏарав Юрий Чайка Северияб Кавказалъул Федералияб округалда РФялъул президентасул вакиллъун тӏамуна.
Гьесде щвезегӏан гьенив вукӏарав Александр Матовников тӏамуна лъелал аскаразул бетӏерав нухмалъулесул заместительлъун.
Юрий Чайкал цӏияб хъулухъалъул «Хӏакъикъаталъе» бицунаго, политолог Ханжан Къурбановас рехсана РФялъул цӏияб хӏукуматалда гъорлъ Северияб Кавказалъул ишазул министерство гӏуцӏун гьечӏолъи.
Хадубги гьес абуна: «Дир пикруялда, хадубккун букӏинарин ккола Кавказалда президентасул официалияв вакил толеб къагӏидаги. Кавказалъ жиндирго жамгӏиябгун политикияб гӏумруялъул цӏияб тӏамач рагьилин ккола кватӏичӏого.
Хас гьабун Дагъистаналъе Чайкал хъулухъалъ кьезесеб пайдаялда гъорлъ дида бихьула ришватчилъиялда данде гьабулеб къеркьеялъул тадбирал. Ай, жеги чанги хӏаким вачун ине рес буго нилъер гьаниса».
Мустахӏикъаб хӏалхьиялъул бакӏалда Чайкае бигьаяб хъулухъ кьунин Путиница СКФОялдеги витӏунин абулел эксперталги руго.
Юрий Чайкада цеве вукӏарав Александр Матовников гьанжелъагӏан гьеб хъулухъалда рукӏарал Путинил вакилзабазда гьоркьов бищунго мисалияв вукӏаниланги тӏаде жубалеб буго гьез.
Бокьараб суалгун тӏаде ани, адабалда тӏадеги къабул гьавун, чиясухъ гӏенеккизе гьунар букӏанила гьесул.
Живго Чайка цӏияб хъулухъалдаса цӏакъ разиго вуго. Путинилгун букӏараб дандчӏваялда гьес абуна жиндир кӏудаэменги вукӏун вугин гьенив хъулухъ гьабулев, гьанже жиндаги Кавказалъул цӏияв сардарилан абизе бегьулилан.