Анцухъа Гӏали
(1947-1996)
Азербайжаналъул Милли-мажлисалъул депутатлъун вукӏарав Гӏали гьавуна 1947 соналъул 1 июналда Азербайжаналъул Белокан районалъул Магъамалар росулъ.
Гьесул эмен Гӏабдулкъадир ккола XX гӏасруялъул 20-абилел соназда Лъаратӏа районалъул Анцухъ росулъа гӏумру гьабизе Белокан районалде арав магӏарулав.
Гӏали кколаан хъизамалда бищунго гьитӏинавлъун. Кӏудиял вацал Гӏалидибир Кӏудияб Ватӏанияб рагъда тӏагӏана, Асилдар чӏаго вуго, Гӏалихан хвана 2009 соналда.
Белоканалда Гӏабдулкъадирица цоги чӏужу ячана — Кьенсерухъа лъай бугеб тухумалъул яс Назани.
Гӏали вукӏана гьелъие Тамарадаса хадув гьавурав вас.
1970 соналда захӏматаб унтудаса хадув гьесул эмен хвана ва вукъун вуго Белоканалда.
Гӏали гӏуна Махӏачхъала шагьаралда, яцалда аскӏов ва, гьениб къасисеб школаги лъугӏизабун, тӏадвуссана Белоканалде.
Жиндирго захӏматалъулаб нух байбихьана геологоразведкаялъул идараялда хӏалтӏиялдаса. Хадув Гӏали вачана Белоканалъул соказул заводалде шоферлъун.
Гӏали вукӏана хӏинкъи-къай гьечӏев, хӏалтӏизе бажари бугев, гӏадамасе кумек гьабизе хӏадурав чи. Гӏумруялъул 20 сон тӏубайдал, гьев вукӏана кӏудияб, цебетӏолеб заводалъул бетӏерав инженерлъун. Заводалъ къватӏибе биччалеб къайи къватӏисел улкабаздеги битӏулаан. Кватӏичӏого гьев тӏамуна заводалъул генералияв директорлъун. Гӏалица, хӏажаталщинал цӏиял станокалги росун, завод гӏатӏид гьабуна ва биччалеб къайи дагьабги цӏикӏкӏинабуна.
Захӏматалдаса хӏинкъуларев гьев лъугьана Закаталаялдагун Белоканалда, ай Цӏоралда ругел магӏарулазул цевехъанлъун ва Азербайжаналъул политикияв хӏаракатчилъун.
90-абилел соназда гьев чанго нухалъ къабул гьавуна Азербайжаналъул президент Хӏайдар Гӏалиевас, гьенир ругел магӏарулазул суалал дандразе.
1996 соналда гьев чӏвана Баку-
ялда.
Саламов Ахӏмад
(1947)
Тохтур, Дагъистаналъул пачалихъияб премиялъул лауреат.
Гьавуна Гъуниб районалъул Чӏохъ росулъ 1947 соналъул 27 январалда, учителасул хъизамалда.
1970 соналда гьев витӏана Гъизляралъул больницаялде цаби-гӏусазул тохтурлъун хӏалтӏизе.
1972-1974 соназда Ахӏмадица лъугӏизабуна Дагъмединституталъул клиникияб ординатура, гьелдаса нахъе хӏалтӏизе лъугьана больницаялда отделениялъул заведующийлъун.
Гьеб отделение поликлиникаялде сверизабун хадуб, гьев тана гьелъул бетӏерав тохтурлъунги.
Ахӏмадица 33 соналъ нухмалъи гьабуна республикаялъул Северияб рахъалъул цаби-гӏусал цӏуниялъул хъулухъалъе ва гьеб лъикӏазул кьеразулъе бачана.
Гьев ккола тӏолгосоюзалъул ва Россиялъул стоматологазул съездазул делегат, тӏадегӏанаб даражаялъул тохтур.
1992 соналда гьесие кьуна «Дагъистаналъул мустахӏикъав тохтур» абураб цӏар. Ахӏмад 1990-1995 соназда вищана Дагъиста-
налъул Верховный Советалъул депутатлъун ва чанго нухалда Гъизляр шагьаралъул собраниялъул депутатлъунги.
Ахӏмад ккола, рагъулал шартӏазда гӏадамал цӏунулаго бихьизабураб бахӏарчилъиялъе гӏоло «Бихьинчилъиялъул» орденалъе муста-хӏикълъарав тохтурги. Гьесдаса хадув Россиялда гьединаб шапакъат кьуна машгьурав лъималазул тохтур Л. Рошалие.
2011 соналда Ахӏмадие медицинаялъул хӏалтӏухъабазе сайгъат гьабураб тӏоцебесеб памятник баялъе гӏоло кьуна республикаялъул пачалихъияб премияги.
2013 соналдайин абуни Дагъистаналъе гьабураб ракӏбацӏцӏадаб хъулухъалъе гӏоло Ахӏмад Саламов мустахӏикълъана «Дагъистаналъул Халкъияв бахӏарчи» абураб цӏаралъеги.
Асхӏабов Асхӏаб
(1948)
СССРалъул гӏелмабазул Академиялъул ва Коми Республикая-
лъул прикладнияб минералогиялъул рахъалъ (1988) пачалихъияб премиялъул лауреат (2007), Коми гӏелмияб Централъул Президиумалъул председатель, Россиялъул ва Болгариялъул гӏелмабазул Академиязул хӏакъикъияв член.
Гьавуна 1948 соналъул 17 августалда Цӏумада районалъул Хуштада росулъ. Цӏалана росдал школалда, хадув 1963 соналда ана Воркутаялде ва гьениб гӏарцул медалалда лъугӏизабуна 10 класс. 1966 соналда цӏализе лъугьана Пермалъул пачалихъияб университеталде. 1968 соналда вачӏана Махӏачхъалаялде университеталъул физикаялъул факультеталде ва гьеб лъугӏизабуна 1971 соналда.
Асхӏабица, Воркутаялде нахъги вуссун, хӏалтӏизе байбихьана школалда физикаялъул учительлъун.
1972 соналда хӏалтӏизе лъугьана РАНалъул Коми гӏелмабазул централда геологиялъул институталда. 1972-1975 соназда цӏалана СССРалъул гӏелмабазул академиялъул Коми филиалалъул аспирантураялда.
1977 соналда цӏунана кандидатасул диссертация.
1981 соналда гьев вищана РАНа-лъул Уралалъулаб отделениялъул Коми гӏелмабазул централда бугеб геологиялъул Институталъул эксперименталияб минералогиялъул лабораториялъул заведующий-лъун.
1989 соналда Ленинградалъул пачалихъияб университеталда цӏунана гӏелмабазул докторасул диссертация.
1997 соналъул 30 маялда Асхӏаб вищана Россиялъул гӏелмабазул академиялъул член-корреспондентлъун.
2006 соналъул маялдаса байбихьун хӏалтӏана Коми гӏелмияб Централъул Президиумалъул председательлъун. 2008 соналъул февралалдаса — Коми гӏелмияб Центра-лъул геологиялъул Институталъул директорлъун.
2011 соналъул 22 декабралда Ас-хӏаб вищана Россиялъул гӏелмабазул Академиязул хӏакъикъияв членлъун (академик).
Гӏумру гьабулеб буго Сыктывкар шагьаралда.
Къурачев Мухӏамадтӏагьир
(1948)
Дагъистаналъул халкъияв артист, Россиялъул мустахӏикъав артист, музыкалияб искусствоялъул рахъалъ республикаялъул пачалихъияб премиялъул лауреат, вокалалъул профессор.
Гьавуна Гъуниб районалъул Чӏохъ росулъ 1948 соналъул 19 декабралда. Росулъ школаги лъугӏизабун, гьев ана Советияб Армиялде хъулухъ гьабизе. Тӏадвуссун хадув хӏалтӏана Дагъистаналъул телевидениялда, лъугӏизабуна Дагъпединституталъул музыкалияб факультет.
1990 соналдаса нахъе хӏалтӏулев вуго «Дагъистан» абураб пачалихъияб ансамблялда дирижерлъун ва солистлъун. Гьес дарсал кьола ДГПУялъул музыкалияб факультеталдаги. Гьеб ансамблялда цебе Мухӏамадтӏагьирица гӏуцӏана «Магӏарулал» абураб Дагъистана-лъул киналго мацӏазда кучӏдул ахӏулеб бихьиназул квартетги.
М. Къурачев ккола педагог, миллатал гӏемераб Дагъистаналъул интеллигенциялъул чӏухӏилъун. Гьес цӏунун руго авар миллата-лъул кочӏол цересел къагӏидаби, гӏадатал. Гьединлъидал гӏолеб гӏелалъул гьунарчагӏазе гьес кьолеб тарбия буго цӏакъ кӏвар цӏикӏкӏараб.
Мухӏамадтӏагьирица гӏуцӏана жидеца халкъалъул гӏадатал, гӏамал-хасият бихьизабулел анцӏ-анцӏ гьайбатал вокалиялгун хореографиялъулал композициял. Гьезда гьоркьор руго «Салам дуе, дир Дагъистан», «Гӏагараб ракь», «Моцӏрол гьумер бугей», «Суйдум», «Кӏиго тӏегь» ва цогидалги.
М. Къурачев вуго машгьурав кочӏохъан, кьурдухъан. Гьев сценаялда вугелдаса буго 50-ялде гӏагарарал сонал. Мухӏамадтӏагьир лъала Россиялда, гӏагарал ва рикӏкӏадисел улкабазда. Гьесул руго гӏемерал Россиялъул ва Халкъазда гьоркьосел конкурсазда росарал бергьенлъаби. М. Къурачевас кучӏдул ахӏула Россиялъул халкъазул батӏи-батиял мацӏазда.
Гьев вуго гӏицӏго кочӏохъан гуревги, махщел цӏикӏкӏарав композиторги. Магӏарул гьунарчиясул бакъназда ахӏулел Дагъистаналъул шагӏирзабазул кучӏдузул къадар 100-ялдасаги цӏикӏкӏун буго. Халкъазул рекӏелъ кидаго цӏунун буго гьес ахӏулеб Дагъистаналъул гимн.
Ракӏбацӏцӏадаб хӏалтӏуе гӏоло Мухӏамадтӏагьир Къурачев муста-хӏикълъана «Гьудуллъи», «Дагъистан Республикаялда цебе гьабураб хъулухъалъе гӏоло» орденазе ва гӏемерал цогидал шапакъатазеги.