Ахираб заманалда гӏемерлъулел руго минабахъ цӏаккеялъул хӏужаби. Аслияб къагӏидаялда гьелъие гӏиллалъунги ккола, токалъул ва газалъул алатал хӏалтӏизарулаго, гӏадамазул кӏвар гьечӏолъи.
Нагагьлъун рокъоб жаниб газалъул махӏ чӏвалеб бугони, нилъеда киназдаго лъазе ккола чирахъ бакизе бегьулареблъи, нагагь бакун бугони, свинабизеги бегьулареблъи. Хех гьабун къазе ккола газ трубабахъе бачӏине хӏалтӏизабулеб кран, рагьизе ккола гордал-нуцӏби. Гьединал хӏужаби ккани, ай нужеда газалъул махӏ чӏвалеб бугони, кӏалъай гьаб номералде: 112-01-04.
Махӏачхъалаялъул Ленинский районалда бугеб Россиялъул МЧСалъул отделалъ лъазабулеб буго ва гӏадамал ахӏулел руго газалъул алатаздаса битӏун пайда босизе.
Гьелъие къваригӏуна:
— Газалъул баллонал щулаго къан ругищал халгьабе.
— Лъикӏаб гьечӏо газалъул баллонал дачабазда, гӏемертӏалаялъул минабазда цӏунизеги.
— Дачабазде хьвадулеб сезон лъугӏулеб заманалда, гьенир газалъул баллонал толел ругони, гьел щула гьарун те, яги нахъе росе.
Цӏодорлъи гьабе цӏа ккеялдаса!