13 февралалда Буйнакскиялъул №2 гьоркьохъеб школалда тӏобитӏана школалъул къадада Наби Мухӏамадовасул мемориалияб хъарщиялъул хӏурматалда данделъи.
Наби Мухӏамадовас лъугӏизабуна рехсараб школа. Гӏумруялъул ахирал соназда гьев хӏалтӏулев вукӏана Америкаялъул Рочестерил университеталда. Гьев рикӏкӏунаан лъикӏав гӏалимчилъун. Гарвардалъул дипломалъул бетӏергьанчӏужу йикӏана гьесул лъади Наталья Щербининаги. Гӏалимзабазул хъизамалда гӏолев вукӏана вас Гӏамирги. Гьезул гӏумру батана цӏакъго къокъаблъун. Нагагьаб балагьалдалъун гӏумруялдаса батӏалъараб хъизамалъул жаназаби Америкаялъ ритӏана ватӏаналде.
Мемориалияб хъарщи рагьиялъул тадбиралда гӏахьаллъана Буйнакскиялъул мэр Исламудин Нургьудаевги, шагьаралъул лъай кьеялъул управлениялъул нухмалъулей Шагьсалам Батироваги, Наби Мухӏамадовасул гӏагарлъигун гьудулзабиги.
Гьениб Наби Мухӏамадовасул хӏакъалъулъ бицана школалъул директор Миясат Сулеймановалъги, учительница Муслимат Хӏасановалъги ва цогидазги. Гьез бицана Нобелил премиялъул анлъго лауреат хӏадуризе бажари букӏанин Наби Мухӏамадовасулин абун. «Америкаялъул Рочестерил университеталъул гӏалимзабаз абулеб буго, гӏумруялдаса хехго ватӏалъичӏевани, Наби живгоги мустахӏикълъилаанин рехсараб премиялъе», — ян бицана кӏалъазе рахъараз.
Тадбиралъулги гӏалимчиясул гӏумруялъулги хӏакъалъулъ гӏатӏидго цӏале «Хӏакъикъаталъул» иргадулаб номералда.