• Цо пуланаб къоялъ дуда бичӏчӏизе буго, ахир-къадги мун ахиралде щваравлъи. Гьебин абуни, букӏине буго байбихьилъун.

• Сухъмахънухккун вачӏунаго, данде вачӏунесе нух биччан, хьибилалдехун гали тӏаме. Кваналелъул дуего лъабил бутӏа те, хутӏараб цадахъ ругезе кье. Гьеб ккола гьаб дунялалда талихӏавлъун вукӏиналъул балъголъи.

• Шапакъат босиялъулъ цогидаздаса цеве кӏанцӏуге. Лъикӏлъи гьабизе цогидаздаса нахъе ккоге. Цогидаз дуего кьолелъул щвезе кколеб бутӏа гурони босуге. Лъикӏал ишал гьарулаго, гьабизе кколелдаса дагь гьабун тоге.

• Цогидазда цебе дурго чин ва хъулухъ кӏочон те. Цогидазда цере ккарал дурго мунагьал рекӏелъ цӏуне. Цогидаз дуе гьабураб лъикӏлъи кӏочене биччаге. Цогидаз дуе гьабураб квешлъи тӏаса лъугьун те.

• Рекӏелъ рохелги гвангъиги бугони, бецӏаб ракьул гвандинибги зобал кенчӏола. Рекӏелъ бецӏлъиги пашманлъиги бугони, бакъул канлъухъеги щайтӏаби гӏемерлъула.

• Квешлъи гьабурас гьеб гӏадамаздаса бахчулеб бугони, гьев битӏараб нухде ккезеги рес буго. Лъикӏлъи гьабурас гьелъул бицун гӏакӏа ахӏулеб бугони, гьеб ккола квешлъи гьаби.

• Инсанасулъ хъантӏиялъул рахъалъ цо пикру бижанигицин гьесул къвакӏи — тамахлъиялде, гӏакълу – ахӏмакълъиялде, рахӏму – согӏлъиялде, рацӏцӏалъи — хъублъиялде сверизе буго. Гьелъин умумуз сахаватлъи багьадурлъилъун рикӏкӏунеб букӏараб.

• Берзул канлъи ва гӏинзул рагӏи – къватӏисел хъачагъал. Хьулал ва къасдал – жанисел хъачагъал. Хважаинас гьел ургъел гьечӏого тани, гьел хъачагъал гьесул хӏакимзабилъун лъугьуна.

• Рижи берцинав чи киназего вокьула. Гӏаданлъи бугес дагӏба цӏодорго лъугӏизабула. Гӏакъилав чияс цогидазул рахӏат хвезабуларо. Ракӏбацӏцӏадав чи чӏухӏдаруларо. Гьединал гӏадамалги релълъуна тӏинчӏнайил гьацӏуда, кванилъ рекъон ккараб цӏамуда. Гьебги ккола инсанасул тӏадегӏанлъи.

• Бечелъиялъулъ ва рецц-бакъалъулъ гӏуразулъ хӏасратал, цӏа гӏадин, гьелегьун рукӏуна. Хӏакимлъиялде ругел къасдал релълъун рукӏуна багӏарараб коралда. Рацӏцӏалъиялъул гьороца гьединал чагӏи цӏорозаричӏони, гьез жалгоги цогидалги рухӏула.

• Анцӏго гъурущ бихьидал гьурмал кьер хисулесухъа бажаруларо гьитӏинаб росдаецин нухмалъи гьабун. Нусго гъурущ бихьидал кьер хисулесухъа бажаруларо аскаралъе нухмалъи гьабун.

• Кидаго жив витӏарав вугин чӏолесул ракӏ хъачӏлъун букӏуна.

• Инсан лъазе гьедигӏан бигьалъуларо. Амма бигьаго лъазе кӏолев мустахӏикъав гьечӏо гьудуллъун кквезе.

• Херазул адаб-хӏурмат гьабуларел гӏолилал заман щвелалдего хола.

• Къойида жаниб цониги лъикӏаб рагӏи рагӏани, цониги лъикӏаб гӏамал бихьани ва жинцаго цониги лъикӏаб иш гьабуни, абизе бегьула гьев чиясул къо гӏадада инчӏилан.

• Эбел-эмен лъималаздаса къадруял рукӏуна. Амма жидехъ гӏенеккуларел лъималазда цебе гьезулги чилъи хола.

• Инсанасулъ цогӏаги ярагьунеб пикру гьечӏони, гьев релълъун вукӏуна кидаго гӏебеде кверги битӏун вукӏунев гьардухъанасда. Инсанасул цогӏаги бокьулеб иш гьечӏони, гьев релълъун вукӏуна цо бакӏалда эхетараб цӏулал хӏохьода.

• Гӏаданлъиялъулал пикраби релълъун рукӏуна ихдалил баракатаб гьорода. Хӏеренго гьеб пуйдал, тӏабигӏат чӏаголъула. Квешал пикраби ре-лълъун рукӏуна цӏорораб савуялда. Гьеб тӏаде ккедал чӏагоябщинаб хола.