«Дир ясалъул буго лъабго лъимер. Гьелъ тӏоцебесеб лъимер гьабидал, ясли-ахалде кьураб гӏарзаялда рекъон, жеги бакӏ щун гьечӏо гьениб. Яс жийгоги хӏалтӏулей гьечӏо, лъимал гӏиссинго рукӏиналда бан, мукъсанаб гурони лъималазе щолеб пособиеги букӏунаро.
Я мина базе кьолеб ракь ялъуни хӏукуматалъул рахъалдасан кумек гуро. Гӏолохъанал хъизамал кире ине кколел гӏарзалъ?»
Гьаб суалалъе жаваб кьуна ДРялъул педагогазул ва гӏелмиял хӏалтӏухъабазул профсоюзалъул рескомалъул юрист Мансур Мухӏамадсагӏидовас:
— Гьеб ккола гӏемераз борхулеб, амма хӏукуматалъухъа тӏубазабун бажаричӏеб суал. Гьеб тӏубазабиялда хадуб халкквезе ккола ДРялъул Лъай кьеялъул ва гӏелмуялъул министерствоялъ ва бакӏалъулаб муниципалитеталъ. Гьениб гӏадлу букӏинабиялъул мурадалда ургъараб ккола ясли-ахалде ине ругел лъималазул электроннияб иргаги. Гьеб рахъалъги нилъер гьаниб ритӏухълъи гьечӏо.
Гьединлъидал, электроннияб иргаялда лъимер лъедал, щивав чияс хал гьабизе ккола щиб номералда гъоркь жиндир лъимадул цӏар хасаб журналалде босун бугебали. Цинги ясли-ахалъул заведующиялъул гъулбасги гьабун, гьеб журналалдаса выписка (документ) тӏалаб гьабила. Дур лъимадул бакӏалда цогидалъе бакӏ кьун батани, гӏарзалъ ина Лъай кьеялъул ва гӏелмуялъул министерствоялде яги бакӏалъулаб муниципалитеталде. Гьенисаги кумек щвечӏони, судалде гӏарза хъвала.
«Ахираб заманалда Дагъистаналъул нухазда автоавария ккечӏеб къого букӏунаро. Гьезул хӏакъалъулъ щибаб къойил бицуна телевидениялдасанги. Рузман къоялъ имамзабазги цо-цо нухалда вагӏзаби гьарула гьелда бан. Амма гьоркьо-гьоркьор гьарулел вагӏзаби гӏолел гьечӏо. Бегьуларищ щибаб рузманалда гьелъул бицине, ай щуго минутгӏаги гьеб масъала борхиялда тӏад хвезабизе?»
Гьаб суалалъе жаваб кьуна ДРялъул Динияб идараялъул хӏалтӏухъан Мухӏамад Гӏабдурахӏмановас:
— Хӏакъикъаталдаги нухазда цӏодорлъи гьабейилан гӏолохъабазда биун ургьибе тӏезе ккараб хӏал буго. Гьайгьай, пайдаяб букӏина щибаб шагьаралда ва росулъ вагӏзаби гьарулаго, имамзабаз гьеб масъалаялда тӏадчӏей гьабуни. Гьеб суал дица дандбала диниял церехъабазда, шагьаразул ва росабазул имамзабазда
«2018 соналъул сентябралда васасе босана квартира. Нижеца гьеб босилалде букӏараб заманалъул коммуналиял хъулухъазухъ гӏарац тӏалаб гьабун, счетал рачӏунел руго нижехъе. Квартира босизегӏан коммуналиял хъулухъаздаса пайда босулеб букӏинчӏелъул, ЖКялъул управляющияб компаниялъ гьарулел ишал законалда рекъон ритӏарал ругищ?»
Гьаб суалалъе жаваб кьуна адвокат Шехмухӏамад Гъазимухӏамадовас:
— Кинабго бараб букӏуна квартира босулаго бичулесги босулесги гьабун букӏараб къотӏи-къаялда. Гьениб документалда нужеца коммуналиял хъулухъазухъ ругел къарзал рецӏизе тӏаде босулеб бугин хъван батани, счетазда рекъон гӏарац кьезе ккола. Судалъ гьеб нужехъа бахъичӏогоги толаро. Къотӏи-къаялда гьедин хъван батичӏони, ЖКялъул управляющияб компаниялъ коммуналиял хъулухъазухъ кколеб гӏарац нужехъа тӏалаб гьаби рикӏкӏуна закон хвезабилъун. Судалъ гурони гьеб суал роцӏцӏинабуларо.
«Социалиял гьиназда хъвалеб буго кватӏичӏого Махӏачхъалаялда маршруткабазда рекӏадухъ багьа 28 гъурщиде бахинабизе бугин. Гьебго заманалда 4 «п» маршруткаялда рекӏаралъухъ 17 гъурущ гурони босуларо. Гьеб хабар битӏараб бугищ?»
Гьаб суалалъе жаваб кьуна ДРялъул водительзабазул ва предпринимательзабазул чияда бачӏеб профсоюзалъул рескомалъул председатель Гӏисалмухӏамад Набиевас:
— Транспорталъул компаниязул нухмалъулезе бокьун буго гьеб иш гӏумруялде бахъинабизе. Халкъалъулгун дагӏба-рагӏи ккеялда хӏинкъун, гьезие бокьун буго жалго шоферзабазул квераздалъун маршруткабазул тариф цӏикӏкӏинабизе, ай цо кьвагьаралъ кӏиго гӏанкӏ чӏвазе.
Махӏачхъалаялда жаниб хьвадулеб 4 «п» маршруткаялда рекӏаралъухъ 17 гъурущ гурони босулеб гьечӏолъиялъ бицунеб буго, гьеб тарифалда ругони, маршутникал зарал кколедухъ хӏалтӏулел гьечӏолъи.
«2020 соналда электронниял захӏматалъулал книжкаби рукӏине кколин абулеб буго. Гьеб хабар битӏараб бугищ, щиб мурадалъе гӏоло тӏобитӏулеб тадбир гьеб кколеб?»
— Исана байбихьизе буго электронниял захӏматалъулал книжкаби кьезе. Бокьани гурони гьеб босизеги кколаро.
2021 соналдаса байбихьун, хӏалтӏи кьолес кагътил книжкаби ругезул хӏалтӏул хӏакъалъулъ баяналгун хӏужаби цифровияб къагӏидаялде рачине ккола.
Амма 2021 соналда тӏоцере хӏалтӏуде лъугьунезе чара гьечӏого кьезе ккола электронниял захӏматалъулал книжкаби. Гьел книжкабазул руго гӏемерал тӏокӏлъабиги. Гьезда цӏунизе руго кагътил варианталда рукӏарал тӏолалго баянал ва хӏужаби.
Исана тӏоцебесеб январалдаса байбихьун, хӏалтӏи кьолес щибаб моцӏалъ жиндирго хӏалтӏул хӏакъалъулъ баянал кьезе ккола Россиялъул пенсиязул фондалде. Гьезул кьучӏалда гӏуцӏизе руго россиялъулазул электронниял захӏматалъулал книжкабиги.
Законалъул кьучӏалда чӏезабизе буго гьеб къагӏидаялде киналго рачӏине кколеб заман. Гьединаб закон къабул гьабиялъе хӏадурлъиги гьабулеб буго.