Чӏарада районалъул Цӏулда росдал аслияб лъай кьеялъул школалъул учительзабаз хӏаракат бахъула цӏалдохъабазе камилаб лъай кьезе. Гьединазул мухъилъ йиго Хадижат Бариеваги.
2004 соналда ДГПИялъул географиялъулгун туризмалъул факультетги лъугӏизабун ячӏарай гьелъ кӏвар кьола цӏалдохъабазул лъай камил гьабиялде, умумузулгун бухьен щулалъизабиялде. Щибаб соналда районалда тӏоритӏулел олимпиадабазда цересел бакӏал ккола Хадижатил цӏалдохъабаз.
2016 соналда гьей гӏахьаллъана «Лъагӏалил учитель» абураб районалъул конкурсалда ва гьениб ккуна кӏиабилеб бакӏ. Гӏахьаллъана «Самый классный классный» абураб конкурсалдаги – гьенийги мустахӏикълъана кӏиабилеб бакӏалъе.
Хадижат йиго лъикӏай гӏуцӏарухъанги – Магъар росдал школалда тӏобитӏулеб ОГЭялдагун ЕГЭялдаги гьелъ лъола жигараб бутӏа. Школалда тӏоритӏула КВНал, «географиялъул анкьал» ва цогидалги тадбирал.
* * *
Цӏулда росдал школалда хӏалтӏулей йиго ингилис мацӏалъул учительница Мадина Жабрагӏиловаги.
Хӏалтӏулаго лъагӏел гурого балеб гьечӏониги, Мадинаца хӏаракат бахъулеб буго лъималазда ингилис мацӏ малъизе.
Мадина йиго гӏамал-хасият рекъарай мугӏалим, цӏалдохъабазги гьелъул хӏурмат гьабула. Гьелъул цӏалдохъабаз районалда тӏоритӏулел ингилис мацӏалъул олимпиадабазда цересел бакӏалги ккола.