(Байбихьи 5-абилеб
номералда)
— Хъаз бикьаралъухъ гьаб дие букӏине ккола! – ян абунила гьес.
Ханасда гьесда абизе жо лъачӏила. Рокъове унелъул гьесие къали цӏун бугӏа кьейилан лъазабунила.
Анила заман. Гьеб лъугьа-бахъин рагӏанила мискинчиясул сихӏирав ва бечедав мадугьаласда. Гьесдаги ракӏалде кканила ханасдасан къиматаб сайгъат щвелародаян.
Хъунила гьес щуго кьарияб хъаз, режанила. Цинги гьел росун, ханасул кӏалгӏаялде къокъанила.
Ханасе цӏакъ рекӏее гӏунила бечедав чияс рачӏарал хъазал ва абунила гьесда:
— Дуда гьел хъазал ращад гьарун дир хъизаналъе рикьизе кӏвани, дица дуе квер цӏалтараб сайгъат кьела, — ян.
Ургъанила бечедав чи, ургъанила, киндай щуго хъаз ханасул анлъго чи вугеб хъизаналъе бащад гьабун бикьилаян ургъанила. Кигӏан ургъаниги, ургъун вахъинчӏила.
Ахӏанила гьес кумекалъе мискинчи.
Гьес босун цо хъаз ханасдаги гьесул чӏужуялдаги цебе лъунила.
— Гьанже нуж лъабгоял ккана, — ян абунила.
Кӏиабилеб хъаз ханасул кӏиявго васасда цебе лъунила:
— Гьанже нужги лъабгоял ккана, — ян абунила.
Лъабабилеб хъаз мискинчияс ханасул кӏияйго ясалда цебе лъунила:
— Лъабгоял нужги ккана, — ян абунила.
Хутӏараб бищун лъикӏаб кӏиго хъаз мискинчияс къвалакь ккунила ва абунила:
— Гьанже нижги лъабгоял ккана, — ян.
Батичӏила ханасда гьесда абизе рагӏи. Виччан танила мискинчи рокъове. Ханасухъа къиматаб сайгъат щвезе ракӏалда букӏарав бечедав чиясул хьулги хӏорлъанила.
Историялъул дарсида
Пашманго школалдаса вуссарав васасда эбелалъ гьикъана:
— Жакъаги историялъул дарсида кӏийилаб ккун рагӏулагури дуе. Гьедин бегьилищ, дир вас? – ан.
— Дида гӏайиб щиб, баба, учителас дун гьавилалдего ккараб жо бицине тӏамураб мехалъ, — ан жаваб кьуна васас.
* * *
Рахьдал мацӏалъул дарсида.
Дица гьумер-кӏал чурана. Дос гьумер чурулеб буго. Дуца гьумер чуризе буго, — ян лъабго предложение доскаялда хъвана учителас.
— Кинаб заман щибаб предложениялъ бихьизабулеб бугеб? – ан лъималаздехун вуссана гьев.
— Гьатӏан къо батила гьениб, — ан абуна, анкьида жаниб цо нухалъ гурони гьумер-кӏал чуруларев васас.
Цӏумур бараб кету
Катица гӏункӏкӏазул цӏакъ рахӏат хвезабун букӏана. Щибаб къоялъ кӏиго-лъабго жо къулчӏулеб букӏана. Цо нухалъ гӏункӏкӏал катидаса цӏунулеб куц дандбазе ракӏаранила. Ургъанила, ургъанила – щибго ургъун бажаричӏила.
Цо гӏонкӏкӏотӏинчӏалъ абуна:
— Дица бицина нужеда катидаса цӏунизе бегьулеб куц. Нилъ хвеялъе гӏилла буго нилъеда кету бачӏунеб букӏин лъангутӏи. Катил горбода цӏумур базе ккола. Кету бачӏунаго, цӏумур зваргъела, нилъги тӏурила.
— Гьеб цӏакъ лъикӏ ургъун буго, — ян абуна цо хераб гӏункӏкӏалъ, — амма лъица бугониги катил горбода цӏумур базе ккела. Дуца гьеб бани, нижеца дуе баркалаги кьела.