Мугӏрул чӏужугӏадан, гӏемерал соназ
Гӏодана поэтал, нужехъ ралагьун.
Нужер къварилъиги нужер къисматги
Къалмикье босана, угьдилаго гьез.
Расул Хӏамзатов
Щияй чӏужугӏаданалъул букӏуна жиндирго кечӏ. Цохӏо жиндиего хасаб. Жиндирго гӏумруялъул кечӏ. Буго гьеб Хӏалимат Жамалудиновалъулги.
Их рогьунеб гьаб гьайбатаб гӏужалда, диеги бокьана 42 соналъ (1957-1999) магӏарул газеталда хӏалтӏарай Хӏалиматил кочӏол сариназухъ гӏенеккизе.
Гьале дун Хӏалиматихъ гьоболлъухъ. Гьелъ цере росун рачӏана «Хӏакъикъат» газеталъул ва журналалъул церегосел номерал. Гьезул чангиялъул гьурмаздасан гьимулеб букӏана Хӏалиматил суратги.
Хӏалимат газеталда хӏалтӏана лъабго бетӏерав редакторасул секретарьлъун (Мухӏамад Шамхалов, Хӏажи Гӏарипов, Гӏали Камалов). Гьединго гьей хӏалтӏана подчитчицалъун, техсекретарьлъун, корректорлъун, кагътазул отделалъул учетчицалъун.
— Доб мехалда дир къисматалъул талихӏ гьелчелеб букӏана. Гьеб дагьабги тӏокӏкӏараблъун гьабулаан гӏумруялъул гьудул Зиявудиница. Гьесул берал къанщаралдаса, талихӏалъул хӏал дагьлъизе лъугьана. Гьединги абизе бегьилищха, кӏиго васги гьезул хъизан-лъималги ругей эбелалъ. Бугониги, нилъеца, магӏарулаз, абуларищха вас — эбелалъул чӏухӏи, яс — эбелалъул бухӏи ругилан. Цохӏого цо йигей яс, эбелалъул дару-дарман, унтидал, бечӏана гӏумруги, чӏунтана ракӏги, рикь-рикьана пикрабиги, — ян къваридго бицана Хӏалиматица.
Чӏухӏиялдаса бухӏи бергьиндал, гӏодана гьелъул кечӏ. Гьелъул сариназулъ рагӏулеб букӏана ясалде бугеб гурхӏелалъул ахӏиги, рекӏелъ гьалдолеб бугеб гьелегьараб цӏадул бухӏиги. Мугӏрул чӏужугӏаданалъул кечӏ гӏодула, гӏумруялъул гьир цӏакъго бакӏлъидал. Амма чӏухӏараб кечӏалъ бетӏер къулуларо. Гьеб гӏодула, амма магӏу, чияда бихьилалде, бацӏцӏуна.
Магӏарул руччаби — батӏи-батӏиялги, цоцазда релълъаралги. Гьединабго букӏуна кечӏги гьезул.
Хӏалиматил кочӏол гъасде гьоболлъухъ арай дун ракӏалдещвеяз юсс-юссун ялей йикӏана.
Бицуна газеталда Хӏалиматил гьанжеги. Гьелъул ритӏухълъиялъулги, кӏигьумерчилъиялде данде гьелъул букӏараб къеркьеялъулги хӏакъалъулъ.
— Чӏалгӏун йиго газеталъухъги коллективалъухъги. Мун щва, дир яс, щибаб кабинеталъуеги ва дир салам бице киназдаго, дун лъалездаги лъаларездаги, — ян абуна Хӏалиматица.
Кӏалдиб гьоцӏоккун бицунеб букӏана гьелъ газеталда араб гӏумруялъул хӏакъалъулъ.
— Берккана дир талихӏалда. Гӏанчӏиялъги гогьлъиялъги беэдараб гьеб ахир-къадги ккана хьухьарал хьухьазул кверщаликье.
Бугониги, доб талихӏалъул къатӏрабиги хутӏун руго Хӏалиматил кочӏолъ. Газеталъулги коллективалъулги бицунелъул, кечӏ твархелеб букӏана, гьеб басандулеб, кьурдулеб букӏана.
Гьелъиеги бокьун букӏана Хӏалиматил хӏакъалъулъ бицине, гьелъул талихӏал сонал ракӏалде щвезаризе.
Дунги гӏодана Хӏалиматил кечӏгун цадахъ, йохана, гьелъул сариназухъ гӏенеккунги. Бокьун буго ахӏизе:
— Хӏалимат, дур речӏарал тӏугьдузе рогьеллъун батаги исанасеб их. Дур сахаватлъиялдаги сахлъиялдаги гьал ихдалил къояз бакъ баккаги. Жеги ракъвазе регӏичӏел талихӏалъул къатӏрабаз лъалъаги дур гӏумруялъул гӏидра.
Хӏалимат, дур кочӏое нух битӏаги.
Газеталъул коллективалъги битӏулеб буго духъе ихдалилаб салам.