«Хӏакъикъат» газеталъул хӏалтӏухъабазул хӏукму ккана росабазул жамагӏатазулгун дандчӏваял гьариялъул мурадалда, «Хӏакъикъат» — пуланаб районалда» абураб ахӏиялда гъоркь, тадбирал тӏоритӏизе. Гьелъул мурадги ккола халкъалъулгун бухьен щула гьаби; рахьдал мацӏалъул, адабияталъул бугеб ахӏвал-хӏал лъазаби; миллаталъул гӏолел ва гӏоларел рахъал цӏехей, гьел газеталда рахъи; гӏолохъанал мухбирзабазе, журналистазе кумек гьаби; газеталъе подписка гьабиялъе квербакъи букӏинаби.
Жакъа Дагъистаналда къадаралъул рахъалъ бищунго цӏикӏкӏараб магӏарул миллаталъул гӏемерал лъикӏал рахъазда цадахъго руго тӏад ургъизе ккарал цо-цо суалалги. Тӏоцебесеб иргаялда, гьел руго цоцалъ гьуинго рукӏиналъул, гъункиялъул, магӏарулазул гӏумруялъул даражаялъул, хӏалтӏудалъун хьезариялъул суалал. Бакӏазда гьарулел дандчӏваяздасан, газетазул гьурмаздасан нилъер рес буго гьезул хӏакъалъулъ щивасул пикру рагӏизе ва гьеб хӏисабалде босизе.
Гьаб нухалда гьоболлъухъ ине ракӏалде ккана Казбек районалде. Гьединлъидал, гьенире иналде районалъул ва гӏадамазул хӏакъалъулъ бицине, гьезул гӏумру-яшав бихьизабизе хӏукмуги ккана.
Жакъа районалъул бетӏер ккола Хӏажимурад Мусаев. Гьев гьавуна 1979 соналда Буртунай росулъ.
1999 соналда лъугӏизабуна Махӏачхъалаялъул автомобилазулгун нухазул колледж, 2010 соналда Москваялда — юридикияб академия.
Хӏалтӏана «Леспромбанкалда, ДРялъул Жанисел ишазул министерствоялда.
2007 соналда хӏалтӏана Казбек РОВДялда.
2009 соналда тӏамуна РОВДя-лъул начальниклъун.
2014 соналъул 25 июлалдаса нахъе хӏалтӏулев вуго Казбек районалъул бетӏерлъун.
Хӏ. Мусаев ккола рагъулал лъугьа-бахъиназул ветеранги.
Баян
Казбек районалда буго 15 школа, 14 лъималазул ах, районалъулаб централияб
ва кӏиго участкаялъулаб больница, тохтурзабазулаб кӏиго амбулатория, фельд-шерлъиялъулгун акушерлъиялъул (ФАП) 9, фельдшерлъиялъул 5 пункт.