2015 соналъул 13 ноябралда гӏуцӏана районалъул депутатазул VI ахӏиялъул собрание. Жакъа къоялде тӏобитӏун буго 38 сессия. Гьениб гьоркьоб лъун буго 165 хӏукму ва гьезда гьоркьор руго нусгоялдасаги цӏикӏкӏун правовиялгун нормативиял актал.
Депутатаз гьоркьор лъезе росулел цо-цо суалал дандрала прокуратураялъул хӏалтӏухъабаздаги.
Депутатазул хӏалтӏул хаслъилъун буго кинабго рагьун гьаби. Гьелъ рес кьола хӏалтӏулъ гъалатӏал риччангутӏизе.
Депутатазул собрание хӏалтӏула администрациягун цадахъ.
Районалъул экономикиябгун социалияб цебетӏеялъул суал бараб буго росабазул администрациял, депутатал лъикӏ хӏалтӏиялда. Гьединлъидал нижеца кӏвар кьола бакӏазда хӏалтӏи пайда кьоледухъ гӏуцӏиялде.
Жакъа республикаялъул гӏеме-рисел программаби софинансированиялда рарал ругелъул, нижеца хӏаракат бахъула жидерго гӏарац жамгӏиял ишазе харж гьабизе хӏадурал инвесторал ралагьизе.
Ниж рохарал руго республикаялда 2019 магӏишатияб соналъул хӏасилал гьарун хадуб Казбек районалъ тӏоцебесеб бакӏ кквеялдаса ва грант щвеялдаса. Гьелъ нугӏлъи гьабула ниж битӏараб нухда рукӏиналъеги.
Районалъул собраниялъул депутатазул аслиял масъалабазул цояблъун ккола гӏолеб гӏелалъе битӏараб тарбия кьеялъул суалазде кӏвар буссинаби, гьел ватӏан бокьулеллъун куцай.
Патриотизм куцаялъул рахъалъ
лъикӏаб мисаллъун рикӏкӏине бегьула Россиялъул президентасул администрациялде кагъатги хъван, Кӏудияб Ватӏанияб рагъ лъугӏаралдаса 74 сон тӏубаялъул хӏурматалда, рагъул ветеран, Ленинаулалдаса Гӏабдурахӏман Мухӏамадовасе Ватӏанияб рагъул кӏиабилеб даражаялъул орден кьей.
Районалъул депутатазул собраниялъул заман лъугӏула исана хасалихъе. Гьелда бан нижеца хӏадурулеб буго депутатаз щуго соналда жаниб гьабураб хӏалтӏи бихьизабураб хасаб буклетги.