88 сон барай Аминат Гӏабдулмуслимовалъул ракӏалдещвеял
Рагъул заман букӏана, кутакаб ракъиги букӏинарищха. Калининау-лалде гочинарилелде цебе, ракӏалда буго, ниж рачун рукӏана хьарал хьонал рахчизаризе. Нижеца гьел рахчизарулаго, цониги мугь кӏалдиб лъеладаян, хадуб халкквейги чӏезабун букӏунаан…
Отаралда, Чуричуризоялда ру-кӏана инсул яцал. Рагъул заманалда гьезухъе унаго загьруяб харилъ баккараб лъабго мичӏчӏ щвана дие кваназе. Ракъуца холел гӏадамаз бакӏарун, кванан, сверухълъиялда букӏинчӏо хутӏун щибго кваназе бегьулеб гӏурччинлъи…
…Дун цӏакъ хӏалтӏулей чӏужу йикӏана. Руго медалал лъикӏ хӏалтӏаралъухъ щварал. Дун кколаан захӏматалъул цеехъан, росдал депутат, колхозалъул правлениялъул член…
Гъеж бекун букӏана дир. Гьединаб гъежгун диргоги, эбел (якьад – авт.) Зулайбатилги хурзал гьарулаан дица. Гьеб гуребги, хӏалтӏун цере лъугӏарал рачунаан, мобилизация абун, гьаричӏого хутӏарал цогиязул хурзал гьаризе.
Дир эбел Салдат йитӏана Терекалде щулалъиялъул канал бухъизе. Гьениса килищ унтун, гьебги би-гъун, ячӏана нахъе.
13 сон барай чӏужу ана дун росасе, Зияводиние. Гьелде щвезегӏан дун цоги чиясе абун йикӏана. Цо нухалъ берталъ дида гьев дун абурав вас вихьана кьурдулей цоялъе хъат чӏвалев. Гьеб квеш бихьун, дида ракӏалде ккана дунги чӏужулъун ячӏун мун воххиларилан. Берталъ, чӏужу ячунаго, чода рекӏарас кьилиги лъун, чу лъугьинабулаан жанибе, гьелда бухьунаан кӏаз. Гьедин Зияводиница чу жанибе лъугьинабидал, дун абун вугев васас абуна диде Зияводиниде цо квешаб кечӏ гьабейилан. Кечӏ гьабизе, гьеб ахӏизе махщел букӏана дир. Дица гьев васасе квешезего Зияводиниде бахъана лъикӏаб кечӏ:
Мун веххе хьвадулел
халатал нухал
Хвалчаца къотӏани,
къокълъилародай?
Дудаги дидаги гьоркьоб щоб буго,
Аллагь шуршудаги
нилъеда гьоркьов.
Гьедин дов чиги живго тун, дун Зияводиние ана. Доб мехалъ бахӏарай гьакида, ялъуни чангъида рекӏун ячунаан. Гьес дунги чангъида рекӏинаюн ячана. Дун Зияводингун данделъараб мехалъ магьари лъураб гурони, ЗАГС гьабичӏо, 13 сон барай дун рукъалде ине гьитӏинго йигилан. Армиялде инелде ЗАГС гьаби хӏажалъун, Зияводиница Дилималдеги ун, гьений хӏалтӏулей йикӏарай Жарият абурай чӏужуги рекъезаюн, хъвезе жоги кьун, гьабуна нижер ЗАГС…
Ниж данделъун хадув Зияводин армиялде ана. Шиябодин гьавураб мех букӏана. Ункъо сон армиялдаги бан, вачӏана Зияводинги…
Нижер сверуда цояз кьураб цо гӏанкӏу гурони, рокъоб щибго букӏинчӏо. Магӏишат, яшав гьабизе бугеб гъираялъ дица гьеб гӏанкӏу хъвечӏого, цӏунана. Гӏабасил Мухӏамадил чӏужу Жубайзат дир яц йикӏана. Дир эбелалъ абун бачӏана Мухӏамадил гӏака бичун босейила (Гертмаялде учительлъун унев вукӏун, гьесул гӏака букӏана бичулеб). Дица абуна, щибги кьун дица гьезул гӏака босилебилан. Хадуй дир эбел ячӏана Алмахъалдаса дихъе щвезе. Булахъалъул рагӏалда гӏадамазе рикьарал хурзал рукӏана. Гьениб цӏоросаролъ бекьараб хур бихьун бугоан щвезе ячӏуней дир эбелалда.
Гьелъ дихъе щведал, нахъеги абуна доб Мухӏамадил гӏака босе-йилан, багӏарлъун азаликун баккун хӏажинкӏа (цӏоросаролъ – ред.) бугин дур бижулеб, бижидал гьеб кьезе доб гӏака босейила.
Гьедин босана дица гӏака. Гьезги гӏедегӏизабичӏого, нижее гӏарац щведал кьезе тана налъи. Гьеб гӏакдадасан, жеги цо гӏачӏар тӏадеги босун, нижер рокъоб гӏуна щуго чӏегӏерхӏайван…
Цӏакъ хех хӏалтӏулей чӏужу йикӏана дун. Цо нухалъ чӏарадилаго Забит (Дадич) вачӏана диде аскӏове. Доегӏанисан хӏалтӏулей йихьун, гьеб хӏалалда газа хьвагӏулей щийдаян лъазе вачӏун вукӏанилан абуна гьес. Дица щибха гьабилеб, Аллагьас гьедин хех хӏалтӏизе йижарай йикӏанаха дун. Передовица абун, колхозалдаса щибаб соналъ сайгъатал кьолаан дие. Гьедин кьун ругьунлъун, цо-цояз гьикъулаан исана щиб дуе кьурабилан…
Цебе заманалда ракъиги бихьана, захӏмалъиги хӏехьана, амма метерисеб къоялде божилъи букӏунаан.