Вирусалъул тӏел бугин тӏаде щвезе гӏагарлъун,
Гӏажалалъул лъар бугин Китаялдаса щолеб.
Воре! Цӏодорлъи гьабе! Гӏорхъаби щула гьаре!
Гӏадан жанив виччаге къватӏисел улкабазул.
Кинабго къайи нилъер «Маде ин Китай» буго,
Гьанже гӏажалги нилъей гьенисандай бачӏинеб,
Рачӏунел унезени гӏорхъичӏвай гьабилаан,
Гӏажал гьукъизе кӏолев чи вуго дий къваригӏун.
Кванил нигӏматал ругел тукабахъ товар течӏин,
Метерисеб къоялда божилъи хунищ бугеб?
Ханжу – чакар букӏунел базаби гӏолел гьечӏин,
Хӏукуматалъул бутӏруз рехун телинищ ккараб?
Нужехъ кванил нигӏматал, хӏалхьезегӏан ругелъул,
Маликумавтасдаги абе дагьалъ чӏайилан.
Маска ххуни «гьукъулеб» гӏажалалъул унтиги,
Инкар ккун нуж чӏанани, чӏвалеб батила нахъе.
Гьардарал дахӏалазе дунялалъул хиралъи,
Хвезе рижун гьечӏелъул даимго гьанир рукӏа.
Нужеда вихьулелъув Гӏизраилги гьечӏелъул,
Гьурмада маскаби ххун хвалдаса цӏуни гьабе.
Базарги базабиги рокъоре сокӏкӏаниги,
Сагӏаталъ нахъе цӏазе къадар нужей кӏвеларо.
Унтудаса цӏунизе жигар гьабунаниги,
Жаннаталде унезе гьелъ кумек гьабуларо.
Чармил къолдаби ретӏе, тӏагӏун бугин бачӏунеб,
Тӏибалъул сабаб къачӏай къо лъугӏарал холареб.
Хехго гӏарадаби цӏе гӏажалалде речӏчӏизе,
Нужго дуниялги ккун, даимго гьанир тезе.
Диени гьабсагӏаталъ хваниги кӏвар гьечӏоан,
Халикъас хирияйгун хӏуснул Хатимат кьуни.
Вирусалъул унтулги ургъел гьабилароан,
Алжаналъувегӏаги рехулев лъалебани.