1 февралалда Москваялда кӏодо гьабуна Гӏали Камаловасул юбилей
Тӏоцебесеб февралалда Москваялда Журналистазул рокъоб, кӏодо гьабуна «Хӏакъикъат» газеталъул бетӏерав редактор, Дагъистаналъул Журналистазул союзалъул председатель ва Россиялъул Журналистазул союзалъул секретарь Гӏали Камаловасул 70-сонилаб юбилей.
Гьеб тадбир гӏуцӏун букӏана Россиялъул Журналистазул союзалъул, Централияб федералияб округалда бугеб Дагъистаналъул Дармил вакиллъиялъул, РФялъул президентасда цебе бугеб ДРялъул хӏукуматалъул вакиллъиялъул ва Россиялъул Халкъазул ассамблеялъул Дагъистаналъул регионалияб отделениялъул хӏаракаталдалъун.
Юбилярасда баркигун кӏалъазе рахъана Пачалихъияб Думаялъул информациялъул политикаялъул, информациялъул технологиязул ва бухьеназул комитеталъул председатель, Россиялъул Журналистазул союзалъул секретарь Леонид Левин, РФялъул президентасул гӏакълучи, РФялъул президентасда цебе бугеб инсанасул ихтиярал цӏуниялъул ва жамгӏият цебетӏеялъул советалъул председатель, Россиялъул Журналистазул союзалъул секретарь Михаил Федотов, Россиялъул Журналистазул союзалъул председатель Владимир Соловьев, Россиялъул Журналистазул союзалъул хӏураматияв председатель Всеволод Богданов, Каспий регионалда ругел улкабазулгун экономикаялъул ва гуманитариял гьоркьорлъабазул Россиялъул президентасул хасав вакил Рамазан Гӏабдулатӏипов, РФялъул президентасда цебе бугеб ДРялъул хӏукуматалъул вакиллъиялъул нухмалъулей Изумруд Мухӏутдинова, Централияб федералияб округалда бугеб Дагъистаналъул Дармил вакиллъиялъул нухмалъулев Мухӏамад Сайгидов ва цогидалги. Гьанибго абилин, юбилярасул адресалда бачӏана Дагъистаналъул бетӏерасул ишал тӏуралев Владимир Васильевасул баркиялъулаб телеграммаги.
Данделъиялда юбилярасе кьуна гӏемерал шапакъатал ва сайгъатал, гьезда гьоркьоб букӏана Пачалихъияб Думаялъул рахъалъан Хӏурматалъул грамотаги.
Данделъиялдаса хадуб «Россия – киназего» абулеб интернет-порталалъул мухбиралъ гара-чӏвари гьабуна Россиялъул Журналистазул союзалда цебе гӏуцӏараб СМИяздасан рорхулел миллиялгун диниял масъалабазул централъул нухмалъулей Сулиета Кусовалъулгун.
«Гӏали ккола солдатасул шинель ретӏарав генерал. Гьес тараб захӏматаб нух тезе, гьес хӏехьараб хӏехьезе – бигьаяб иш гуро. Бигьаяб иш гуро — гулбузул ва кьвагьиялъул гьаркьихъе хӏалтӏизе. Рахӏат толеб гьечӏо гьесул ракӏалъе журналистал чӏваялъул хӏужабаз. Къокъабго заманалда жаниб свана 19 журналистасул гӏумру. Гӏакълу цӏубарал журналистал чӏвана республикаялда – гьелъги бицуна республикаялда бугеб рагӏул багьа. Магӏна гъваридаб рагӏул багьаялъул къимат лъала Камаловасда, гьес кидаго рахъккола битӏараб рагӏи абизе нахъе къаларесул. Гьединал гӏадамал къваригӏун руго жакъа.
Ракӏбацӏцӏалъи ва журналистасул рагӏуе ритӏухълъи – гьеб хираго чӏана Дагъистаналъе – гьебго бихьулеб буго дида Камаловасулъги. Гьев ккола политикги, жамгӏияв хӏаракатчиги, сугъулдерил жамагӏаталъул гӏадатияв чиги. Гьес кинабго хӏалтӏи гьабула гӏакъилав пачалихъияв инсанас гӏадин.
Абизе ккола, нилъеца гӏицӏго гьавураб къо гуро кӏодо гьабулеб букӏараб Гӏалил, жакъа Москваялда кӏодо гьабулеб букӏана политикияв хӏаракатчиясул ва Дагъистаналъул вакиласул юбилей. Жакъасеб данделъиялъ бихьизабуна регионаздаса журналистал цере рукӏин федералиял журналистаздаса. Щайин абуни, Кавказалъул журналистал руго халкъалде гӏагарал, гьезулъ цӏикӏкӏун буго ракӏбацӏцӏалъи. Батӏалъи гьечӏо — журналистал, гӏалимзаби, политикал – киналго цо федералияб майданалде данделъичӏони, нилъер улкаялда вацлъиялъулаб миллияб политика букӏине гьечӏо.
Нилъ гьабсагӏат рикь-рикьун руго, нилъер гьоркьорлъаби кьватӏелазул цӏун руго. Гӏали гӏадал гӏадамаз кӏудияб хӏаракат бахъулеб буго гьел кьватӏелал седезе, миллатазда гьоркьоб гьуинлъи бекьизе. Гьаб данделъиялъги бихьизабулеб буго Россиялъул рес букӏин унго-унголъунги гъункараб улкалъун лъугьине. Гьелъие гьодорал гурел, Гӏали гӏадал камилал, кьучӏал гӏадамал хӏажат руго», — ян абуна гьелъ.
Официалияб бутӏаялдаса хадур ахӏана магӏарул кучӏдул, рихьизаруна миллиял кьурдаби.
Патӏимат Расулова,
«Россия – киназего» абураб интернет-порталалъул мухбир