Къогоялдаса цӏикӏкӏун соналъ цебе Мокъокъ росдал рагӏалдаса, къогогӏан метралъул манзилалда къедги биххун, хвезабуна Кимялъ ва Лъерухъ росабазул советазул 15 росулъе ва гьездаго гьоркьоб Шаури росдал советалъул Цебари росулъеги унеб шагьранух.
Кӏигоялдасаги цӏикӏкӏун моцӏ ана дагӏба-къецалда, нухазул отделалъ базе кколин росдал совет, бакӏалъул советалъ базе кколин нухазул магӏишаталъул хӏакимзаби.
Гьеб заманалда 16 росдал гӏадамаз, райцентралде яги шагьаразде ине ккани, бегизе кколаан кӏиго мегӏер: Цицимахъ ва Элбокъ.
Цебари-Шапихъ нух доб заманалда рагьун букӏинчӏо. Риидал шагьаралде щварав дун ваккана нухазул идараялде.
Нухазул хӏакъалъулъ хабар ккедал, гьелъул нухмалъулев Мухӏамадов Мухӏамадица абуна жиндир масъала бугила Шаури-Эчеда, Чӏалда-Къорода, Цебари-Шапихъ нух рагьизе, амма гӏарац гьечӏолъиялда бан, халат бахъунеб бугин. Мокъокъ росдада аскӏоб къедги бакӏалъулаб советалъ базе кколин, мокъокъдерица росдада гъоркьан нух бахъизеги биччалеб гьечӏин.
Чанго къоялдасан магӏарухъе щведал, къед гьабизе гӏолохъаби рачун ратана нухазул отделалъ. Кӏиго батӏияб къагӏидаялда росдада гъоркьан нух бахъизе проектги гьабун букӏана. Цоялда рекъон, нух бахъизе букӏана росдада дандбитӏун, амма лъабкъого метралъул борхалъуда халатаб кьо лъезе кколаан.
Хадусел соназдаги бахъун букӏана проект, жакъа-метер хӏалтӏи байбихьулеб бугилан. Росулъан машинаби рахине кӏоларого, кӏудияб къварилъи букӏуна, хасго цӏадал рараб заманалда. Гӏадамазул минабазда аскӏоса чӏахӏиял машинаби хьвадараб мехалда гьезие зарал ккола. 2018 соналъул риидал гьаваялъул десанталъул учение унеб мехалда, нус-нус рагъулаб техника хьвадиялъул хӏасилалда ккана минабазе жагъаллъи. Росдада гъоркьан нух бахъиялъе бигьалъи гуребги, бакӏалъулаб ункъо администрациялъул 26 росулъе унеб нух къокълъула кӏиго километралдасаги цӏикӏкӏун манзилалъ. Лъабго соналъ цебеги, лъабабилеб нухалдаги бахъана проект, ахир-къадги кӏиго соналъ цебе баккана нух бахъизе байбихьизе бугин абураб хабар. Амма лъица бахъизе бугебали баян гьабичӏо.
Ахир-къадги, 2018 соналъул октябрь моцӏалда, тендерги бергьун, нух бахъизе байбихьана «Мугӏрул» абураб кооперативалъ. Цересел соназда гьебго кооперативалъ нух бахъана Цебари, Шапихъ, Цицимахъ магӏардаса Кӏилъартӏе. Чанго километралъул нух бахъун букӏана Махъалалъ росулъа эхеде, гуржиязул гӏорхъодаса Цӏумада районалъул Хушет росулъе –анцӏгоялдаса цӏикӏкӏун километралъ.
Гьенив хӏалтӏулев вукӏана, Шаури-Эчеда нух бахъулаго, ВЛКСМалъул ЦКялъул грамота щварав Гӏумаров Мухӏамад. 10-15 градусалъул цӏорой букӏаниги, декабрь бащалъизегӏан нух бахъана.
Гъоркьиса ихдал цудунго байбихьана кьуру борлъизе ва радал анлъго тӏубаралдаса къаси бецӏлъизегӏан техникаялъул хъуй камулароан росдада гъоркьан.
Апрель моцӏалдаго кьурул чанго метр кьвагьизе хӏадурлъун бугониги, гьеб кьвагьизе гӏадамал рачӏинчӏо. Хадубкун баянлъана, кьурул хӏалтӏаби, ай гьеб кьвагьизаби, проекталда рихьизарун гьечӏеблъи. Гьедин 4-5 моцӏалъ халалъана, кьуру кьвагьичӏого, техника хӏалтӏизабизе ресги гьечӏого.
Нухазул идараялда хӏалтӏулезда лъазе кколаан, цӏунтӏадерил согӏал мугӏрул ругеблъиги ва гьениб кьурдаги гъутӏби рижулеблъи.