Анищалъул цӏваялъул канлъухъе
Унго-унгоги, гӏолохъанлъи, дулъ бугебщинаб гьунарги, гучги, гьелчейги, къеркьейги, рорженги. Дулъ гьелегьун беролел пикрабазги анищазги тӏаса бищула гӏицӏго тӏадегӏанлъи. Дуца щивав гӏолиласухъе кьола жиндирго анищалъул цӏва. Гьеб цӏваялъухъе нух бахъулаго, гӏолилал тӏуркӏуларо, гьезда лъаларо захӏмалъи щибалиги. Доба борхалъуда бугеб гьеб цӏваялъ гӏолилазухъе ритӏун рачӏуна жиндихъе щвезелъун гьез тӏуразаризе кколел тӏадкъаял. Цинги байбихьула жиндирго анищалъул цӏваялъухъе щивасул бугеб тӏадегӏанаб къеркьей. Гьединал лахӏзатаз каранда ракӏги басандула, биги гьелегьуна, анищалги кьурдула. Ва гьеб киналъулго хӏасилалда анищалъул цӏваялъ гӏолилазул гӏумруялъе канлъиги кьола. Ва гьеб канлъухъе гьел роржуна къисматалде данде.
Гьеле гьединаб талихӏаб канлъухъе, жиндирго анищазул куркьбаздаги рекӏун, йоржуней йиго гьайбатай магӏарулай Хадижатги. Гьелъул къисматалъул хӏайранаб къисаялъ пана гьаюна дун. Гьелъ рачунел хӏасратал бакъназухъ гӏенеккидал, рухӏдаллъизе бачӏана къисматалъул согӏаб кӏичӏикье ккезе доб хӏикматаб цӏваялъ течӏей гӏолилалъул къеркьеялда. Жибго гьеб цӏваги Хадижатил каранда ракӏлъун кенчӏелеб буго.
Дагъистаналдаса тӏоцеесей художник-мультипликатор
Дагъистан тун къватӏибехун гӏумру гьабун йигей цоги магӏарулай! Мугӏрузул улкаялдаса тӏоцеесей художник-мультипликатор! Гьелъ рахъарал суратазухъ ялагьун гӏорцӏулейго гьечӏо. Гьезул кумекалдалъун бицунеб буго гӏолилалъ гьитӏинаб ватӏаналде бугеб жиндирго кӏудияб рокьулги, магӏарул тарихалде бугеб гьайбатаб гӏищкъуялъулги, жиндирго анищалъул цӏваялъухъе гьабураб бигьаяб гуреб, амма тӏадегӏанаб рорженалъулги хӏакъалъулъ.
Гьаюна Хадижат Мухӏамадова Махӏачхъала шагьаралда Гъуниб районалдаса Иманшапил ва Хунзахъ районалдаса Зульфиял хъизамалъе. Гьитӏинай Хадижатил сахлъиялда бан, гьелъул ункъо сон бугеб мехалда, хъизан гочана Тула шагьаралде. Гьениб ясли-ахалдаго тӏатине лъугьана Хадижатил пагьму-гьунар. Цинги — шагьаралъул №65 школалда цӏали. Хадижатихъе учительзаби рокъорего рачӏунааан – гьелъие захӏмалъулеб букӏана къойил школалде ине. Амма гьелъул эркенаб заманцин букӏунароан – Хадижат свакалей йикӏинчӏо суратал рахъун. Киналго лъималазе бокьулелъул суратал рахъизе, рокъосезги гьелде байбихьуда кӏудияб кӏварго кьолеб букӏинчӏо. Амма соналдаса соналде цӏубалеб букӏана суратал рахъизе гьелъул бугеб пагьму. Къого сон базегӏан, къеркьана Хадижатги Хадижатил пагьмуги согӏаб унтигун. Амма гӏолилалъул гӏумруялде бугеб гӏащикъаб рокьул кутак бергьана больницабазул палатабаздаса. Гьенибги батана гьелда къуват. Гьеб гьелъие кьолаан суратаз ва доба хъахӏилзобазда жинца кунчӏи кьеялъухъ балагьун чӏун бугеб анищалъул цӏваялъги. Хьвадизе лъугьана аскӏобго бугеб ИЗОстудиялде, гӏахьаллъулаан школалда ва шагьаралда тӏоритӏулел суратал рахъиялъул къецазда ва выставкабазда. Заманалдасан шагьаралда тӏобитӏана Хадижатил суратазул выставкаги. Цадахъго — гӏемерал шапакъаталги, дипломалгун грамотабиги. Кунчӏана гӏолилалъул цӏва. Ва дагь-дагьккун гьеб гвангъизе байбихьана. Хадижатица сапар бухьана гьитӏинго бижараб анищалъухъе – гьелъие бокьун букӏана художник-мультипликаторлъун яхъине.
2009 соналда гьей лъугьана В. Д. Поленовасул цӏаралда бугеб художествияб школалде. Амма школа лъугӏизабизе санагӏалъи ккечӏо, гьаб нухалдаги сахлъиялда бан. Дагьабго сахлъи щулалъидал, гьелъ цоги нухалда хӏалбихьана цӏализе лъугьине. Гьанжесала – Репинил цӏаралда бугеб Санкт-Петербургалъул академиялде. Гьаб нухалдаги согӏаб къисматалъ хӏалбихьана гӏолилалъул анищалда цебе хӏетӏе кквезе – академиялъул тӏасиял тӏалабазде яхине гьелъие захӏмалъана. Захӏмалъаби дандчӏванагӏан, бокьулеб букӏана гьелъие жиндирго анищалъухъе щвезе.
Цоги нухалда хӏалбихьана цӏализе лъугьине. Гьаб нухалда – Москваялъул пачалихъияб кинематографиялъул институталда цере рагьарал лъагӏалил курсазде. Гьездаго цадахъ дистанционнияб къагӏидаялда цӏалун лъугӏизабуна 11-абилеб классги.
Школа лъугӏун хадуб Хадижат лъугьана А.С. Даргомыжскиясул цӏаралда бугеб Тулаялъул искусствабазул колледжалде. Ва гьеб лъугӏизабуна 2018 соналда.
Гӏолилалъ анищалъул цӏваялъухъе гьабулеб сапар гьоркьоса къотӏизе толеб букӏинчӏо. Цӏваялъ гьей жиндирго канлъухъе ахӏулей йикӏана.
Хӏалтӏизе лъугьана Санкт- Петербургалда бугеб анимационнияб киноялъул «Мельница» киностудиялде. Гьанибго цӏидасанги сахлъи гьечӏолъиялъ квалквал гьабизе байбихьана. Амма гьединал квекӏеназ Хадижатил рекӏелъ гӏумруялде бугеб рокьул цӏа дагьабги гьелегьинабулеб букӏана. Гьелда ракӏалдецин кколеб букӏинчӏо нахъе къазе. Гӏолилалъул жиндирго хӏалтӏуде бугеб рокьиги адабги бихьун, гьелъие кумек гьабизе байбихьана киностудиялъги. Гьабсагӏаталъги Хадижат гьений хӏалтӏулей йиго.
Ясалъул анищалда куркьбал рижиялъе, тӏоцебесеб иргаялда, кумек гьабуна эбел-эмен Иманшапицаги Зульфияцаги. Ахир-къадги Хадижатие къисмат гьимараб Санкт- Петербургалда гӏумру гьабулеб буго гьезул хъизамалъ.
Бокьула Хадижатие гӏагараб Дагъистан. Гьелъул тӏабигӏаталъухъги гӏадамазухъги рокьи ккарал суратал гӏемер руго гьелъул. Санайилго гӏадин жиндирго эбел-эменгун, яцал Эмилиягун ва Меседгун гьей щола Дагъистаналде. Гьелъул хӏалхьоларо гӏагараб ватӏаналъул берцинлъиялдаса, ва гьелъ гьеб берцинлъиялъул гӏадамазе бицине тӏамула жиндирго суратал.
Гьединго, Хадижат гӏахьаллъула Тӏолгороссиялъул творческиял проектаздаги.
— Дие цӏакъ бокьула художник- мультипликаторасул бигьаяб гуреб хӏалтӏи. Гьеб кӏвар цӏикӏкӏараб ва захӏматаб букӏиналъги батила дида дирго гӏузрабиги кӏочарал ва дирго цӏваялъухъе йоржинеги бажарараб, — илан абуна Хадижатица.
Гвангъулеб, кунчӏулеб буго гӏолилалъул цӏва, гьелъул анищазе цӏаги кьолаго.
Гьарула гьеб цӏадуе гьелегьинги, цӏваялъе беричлъиги, анищазе тӏадегӏанлъиги.