Коронавирусгун къеркьолаго унго-унгояб бахӏарчилъи бихьизабурал тохтурзабазе баркалаялъул кагътал кьуна республикаялъул нухмалъулев Владимир Васильевас. Гьезие мустахӏикълъана 10 000-ялдасаги цӏикӏкӏун чи. Гьединго хӏурматиял шапакъатал ва цӏарал кьун кӏодо гьаруна сахлъи цӏуниялъул 223 хӏалтӏухъанги.
Гьезда гьоркьоса «Реццалъе мустахӏикъаб захӏмат» абураб шапакъат щвана анкьго чиясе, 128-ясе кьуна «Республикаялъул мустахӏикъав тохтур» абураб цӏар, 41-ясе -«Республикаялъул сахлъи цӏуниялъул мустахӏикъав хӏалтӏухъан» абураб цӏарги. Тӏад цӏар хъварал сагӏтал сайгъат гьаруна 15 тохтурасе.
РФялъул президент Владимир Путинил указалда рекъон, «Пироговасул Орден» кьун кӏодо гьаруна республикаялдаса сахлъи цӏуниялъул 20 хӏалтӏухъан. Гъоркьехун кьолеб буго гьезул сияхӏ:
Гӏабдулмутӏалибов Ибрагьим Гӏабдулмутӏалибович – отделениялъул заведующий.
Гӏабдурахӏманова Гӏайшат Асхӏабовна — отделениялъул заведующий.
Абуева Аида Агъаевна – тохтур.
Альбориев Гӏабдула Хайрулаевич — отделениялъул заведующий.
Аслангерев Гӏабдухӏамид Мухӏамадович – тохтур.
Хӏажиева Гюльжанат Сиражудиновна – тохтур.
Хӏусенов Заур Гӏалиевич – тохтур.
Идрисов Хӏажимухӏамад Идрисович — отделениялъул заведующий.
Идрисова Гӏайшат Идрисовна – тохтур.
Исмагӏилов Халид Мухӏамадович — отделениялъул заведующий.
Къураев Наби Шамилевич – тохтур.
Къурбанов Мурад Мухтарович – тохтур.
Мухӏамадгӏалиев Мухӏамадгӏали Асадулаевич — отделениялъул заведующий.
Мурадова Валида Рахӏматулаевна – тохтур.
Рабаданов Мухӏамадрасул Мухӏамадович — отделениялъул заведующий.
Сагӏитаева Гӏайшат Хӏамзатовна — отделениялъул заведующий.
Султанбеков Руслан Мухӏамадович – тохтур.
Тӏагьиров Хӏусен Муртазагӏалиевич – тохтур.
Ходжаев Эмил Зиядханович – тохтур.
Шамсудинов Мухӏамад Хӏажимурадович – тохтур.
«Хӏакъикъат» газеталъул редакциялъги ракӏ—ракӏалъ баркула тохтурзабазда гьел шапакъатал. Горбода мусруги жемунин абухъего, нахъе къачӏого, гӏажалаб унтуца квелъ биччарал бакӏазда сордо—къо батӏа гьабичӏого хӏалтӏарал гьелги гьезда цадахъ рукӏаралги абадияб реццалъе мустахӏикъал руго. Анцӏ—анцӏ тохтурасда гӏажалги батана гьениб. Хваразе алжан насиблъун батаги. Чӏаго ругезе тавпикъги щулияб сахлъиги кьеги бигьаяб гуреб заманалда, захӏмалъиги къулчӏун, нилъер сахлъиялъе гӏоло, гурун гъуждулгун, бакӏаб борч тӏубазабизе. Аллагь разилъаги киназдасаго.