1 сентябралда республикаялъул киналго школал рагьизе руго щибниги хис-баси гьечӏогоян лъазабуна ДРялъул Лъай кьеялъул министерствоялъ гьал къоязда. Байрамкъоялъул дандеруссиналги цогидаб гьабулебщинабги гӏадатияб куцалъ тӏобитӏизе буго, амма Роспотребнадзоралъул тӏалабалги цӏунун.
Коронавирус тӏибитӏиялъул хӏин-къи бугеблъиги хӏисабалде босун ва РФялъул президентасул тӏадкъаялда рекъон, Роспотребнадзоралъ тасдикъ гьаруна лъай кьеялъул идарабазда цӏали гӏуцӏиялъул рахъалъ цӏиял тӏалабал, ай санитариял нормаби.
Тӏоцебесеб сентябралде школазда ва вузаздагун колледжазда гьабизе ккола «генералияб уборка». Цӏалул идараялде жанире лъугьиналде щибаб къоялъ борцине ккола дарсазде рачӏунел цӏалдохъабазул температура. Цӏа-кан бахун батани, цӏалдохъаби школалде риччазе бегьуларо. Школалъул кӏалтӏа цого заманалда гӏемер чи вакӏарунгутӏиялъул мурадалда рагьухъего рукӏине ккола школалъул минаялда жанире лъугьунел киналго нуцӏби (гьайгьай, щибаб нуцӏихъ эхетизе ккола температура борцунел чагӏиги).
Нижеца цебеккунги хъван букӏана Роспотребнадзоралъул киналго тӏалабазул хӏакъалъулъ. 12 августалда РФялъул регионазде битӏараб Роспотребнадзоралъул кагътида рекъон, цо дагьалъ хисизарун руго гьел. Масала, щивав цӏалдохъанас маска ххезе кколаро – гьелда бан хӏукму гьабизе ккола цӏалдохъабазул эбел-инсуца. Амма богорукъалъул хӏалтӏухъабазда тӏадаб буго маскабигун квердаххелал разе. Маска базе ккола учительзабазги. Жиб-жиб классалъе киналго дарсал кьезе руго цого кабинеталда, амма дарсида хасал алатал хӏажалъулел ругони, гьел рачине бегьула алатал ругеб кабинеталде. Масала, химиялъул, биологиялъул, физикаялъул дарсазда опытал гьарулел ругони, гьел дарсал кьезе руго хасал кабинетазда.
Гьукъун буго классазда ва школазда гьоркьосел цадахъал тадбирал тӏоритӏизе. Гьукъун буго 2020 соналъул ахиралде щвезегӏан гӏемер чи гӏахьаллъулел тадбирал гӏуцӏизеги. Масала, Лъаялъул къо тӏобитӏизе ккола щибаб классалъ батӏаго ва азбаралда яги майданалда. Гьелъул гӏахьалчагӏазда ран рукӏине ккола маскаби, хасго цӏалдохъабазул эбел-инсуда.
Дарсал байбихьизе ккола радал сагӏат микьгоялдаса хадуб. Факультативазул ва батӏи-батӏиял предметиял кружоказул дарсал кьезе руго каникулазул заманалда яги гьатӏанкъояздагун байрамкъоязда.
Рехсараб кагътил ахиралда хъван буго: «Эпидемияб ахӏвал-хӏал хӏалуцани, рикӏкӏадасан цӏали гӏуцӏиялъе ресал ратизе ккола», — ян абун.