Европаялъул церетӏурал пачалихъазул экономиказда гьоркьохъеб бизнесалъ кколеб батани 60-70 процент, Россиялда гьеб 20-ялдаса тӏаде унаро. Гьелъул даража эхеде арабгӏан, «гьоркьохъеб классалъул» къадар цӏикӏкӏарабгӏан бокьараб пачалихъалъул экономикиябгун социалияб гӏумруялъул кьучӏ щулияб букӏинги гьаб заманалда лъиениги балъголъи гуро. Дагъистаналъул предпринимательствоялъул (гьитӏинаб ва гьоркьохъеб) цо-цо хаслъабазул ва пачалихъалъул рахъалъ гьелъие гьабулеб кумекалъул нижеца гьикъана предпринимательствоялъе квербакъулеб Централъул специалист, Хунзахъ районалъул Тӏануси росулъа Гӏабдулаев Махӏачида.
— Махӏач, кинал масъалаби тӏуралел нужер Централъ, кинаб хӏалтӏи нужехъе кколеб?
— Нижер учредительлъун ккола предпринимательствоялъулгун инвестициязулаб Агентство ва гьеб гӏуцӏун букӏана 2015 соналда.
Фондалъул буго ункъо отдел:
— Инжинирингалъул регионалияб центр;
— Предпринимательствооялъе квербакъулеб центр;
— Халкъиял художественниял промыслабазул центр;
— Экспорталъе квербакъулеб центр.
— Инжинирингалъул регионалияб централъ лъазарула гьитӏинал ва гьоркьохъел предприятиязул ругел ресал-сурсатал, ралагьула гьел церетӏеялъе ругел нухал, загьир гьарула гьезул масъалаби ва квербакъула гьел тӏураялъе; предприятиязул хӏалтӏи цӏигьабиялъе, гьенир цӏиял технологиял хӏалтӏизе риччаялъе гӏуцӏула хасал программаби, бизнес-планал.
— Предпринимательствоялъе квербакъулеб централъ тӏоритӏула лъай кьеялъул, малъа-хъваялъул батӏи-батӏиял тадбирал; гӏуцӏула экономикаялъул гӏемерал рахъал гьоркьоре росарал форумал, конференциял, гургинал столал; ралагьула гьоркьохъеб бизнесалъул предприятиял ва бизнесчагӏи тӏолгороссиялъул ва халкъазда гьоркьосел ярмаркабазда, выставкабазда гӏахьаллъизе, гьезул къайи-цӏа гӏадамазда бихьизабизе, лъазабизе ресал.
— Экспорталъе квербакъулеб централъ гьединал ресал ругел предприятиязе къватӏисел пачалихъазул мацӏазда гӏуцӏула цӏиял ялъуни цӏи гьарула ругел сайтал; лъазарула нилъер къайи-цӏаялъул рахъалъ цоги пачалихъазда ругел тӏалабал; квербакъула къватӏисел пачалихъазда нилъер интеллектуалияб буголъи цӏуниялъе, хасал патентал щвеялъе; гӏуцӏула ва нухда рачуна, регионазда гьоркьор ругел ва халкъазда гьоркьосел бизнес-сапарал, бизнес-данделъаби.
— Халкъиял художественниял промыслабазул централъ кумек гьабула нилъер халкъиял промыслабазул тӏагӏелал Россиялъул ва халкъазда гьоркьосел выставкабазда цере росиялъе, гӏахьалчагӏазда гьел рихьизариялъе; квербакъула гьединал тӏагӏелал электрониял дармилал майданазда лъеялъе; лъазарула цоги регионазда гьел ричизе ругел ресал, чӏезарула гьезда рекъарал шартӏал.
— Нужехъ ругел баяназда рекъон, нилъер кинаб продукциялъул тӏалаб бугеб цоги регионазда, къватӏисел пачалихъазда?
— Аслияб куцалда гьел ккола кванил нигӏматал. Гуржиялде ва Азербайжаналде уна чӏагояб боцӏи, Ираналде гьан, пихъил цо-цо тайпа ва ччугӏа Азербайжаналде, босула нилъер минералияб лъим, пиринчӏ, цӏолбол нигӏматал.
— Аслияб куцалда кинал предприятиял кумек гьарун нужехъе рачӏунел, гьезул къадар сонидаса сонида цӏикӏкӏунебищ бугеб, дагьлъулебищ?
— Гьел киналго руго гьитӏинаб ва гьоркьохъеб бизнесалъул вакилзаби, гьезда гьоркьор руго цӏияб хӏалтӏи байбихьулелги, гӏезегӏан заманалъ хӏалтӏулел ругелги. Фондалъ тӏуралел масъалабиги, гьабулеб хъулухъги цӏикӏкӏунеб букӏиналъ, тӏадеялдаса тӏаде цӏикӏкӏунеб буго нижехъе рачӏунезул къадарги.
— Коронавирусалъ гӏемер хисизабунищ нужер хӏалтӏул низам?
— Гьелъул хӏасилалда нижеда кӏвечӏо ва гьабсагӏаталдаги кӏоларо гӏемерал гӏадамал гӏахьаллъун гьаризе кколел тадбирал тӏоритӏизе. Хадуркун гьаризе тана хӏисабалде росун рукӏарал батӏи-батӏиял форумал, ярмаркаби, выставкаби. Хутӏараб хӏалтӏи унеб буго 2020 соналъул планалда рекъон.
— Дурго росдал мисалалдалъун кин унеб бугин кколеб дуда гьоркьохъеб бизнесалъул хӏалтӏи магӏарухъ?
— Лъалеб жо буго бизнесалъул хӏалтӏи, гьелъул цӏиял къагӏидаби аслияб куцалда цере инарулеблъи гӏолохъанаб гӏелалъ, гьелги росабиги тун шагьаразде унел руго. Гьединлъидал росабалъ бизнес цебетӏолеб гьечӏо, ахираб заманалда дагьабго цебетӏей буго туризмалъул.