Бухӏараб бакъул къоялъ террористаз сверун ккураб Шодрода росулъа херай эбел нахъе ячине унел дунги дир хъизанги лъалхъизаруна Болъихъ райвоенкоматалъул хӏалтӏухъан Сурхаев Шамилица. Гьес абуна цадахъ живги вилълъинин, жиндир машинаялде рахаян.
Росу ахадаса тӏараде щвезегӏан ратана яргъид гӏуцӏарал хъача- гъас. Цоял ругоан хӏамузда, чуязда ярагъги лъун, Хӏамилгӏин магӏарде гьеб щвезабизе ине къачӏадулел, цогидал — хьиталги рахъичӏого какал ралел, цо тайпа — мажгиталда жаниб бокӏнидеги руссун (дир хӏисабалда) наркотикал хӏалтӏизарулел.
Годекӏанире щведал, нижер машина сверун ккуна щуго-анлъгояс, ва цояс абуна: «Машинаги рахаге, кӏулалги дихъе кьун къватӏире лъугьа», — ян. Тӏолабго сверухълъи чӏегӏерлъизабураб гьеб къапилаялда гьоркьоса дир берчӏвана бакъукь кӏусун вугев дирго вукӏарав учитель Хӏамидов Гӏабдула Гӏалиевичасда.
— Гӏабдула, мун щай бакъукь чӏун вугев? Вахъа рагӏдукье, — янги абун, гьесие хӏалае унев дун лъалхъизавуна цо магжилас.
— Воре дида аскӏове вачӏунге! Дун гьаз туснахъ гьавун вуго! Дица гьазул рагъухъан лъукъана! Дица гьал лъукъун тезе гьечӏо, чӏвазеги руго, — ян абуна Гӏабдулаца. Гӏабдулада аскӏове унев дун, хъачагъас лъалхъизави рекӏее гӏечӏей дир хъизам Патӏиматица, йортунги ячӏун, Гӏабдулал рукьги ккун, ахӏун абуна:
— Гьаб буго гьасул росу. Гьединлъидал гьав чи гӏодов чӏезе вуго гьасие бокьараб бакӏалда, — ян.
Дида ракӏалде щвана 1994 сон. Чачаналда букӏараб тӏоцебесеб рагъулаб компания! Чачаналдаса лъутун рачӏарал. Ракӏалда буго дагъистанияз гьел къабул гьарураб куц. Вахӏ! Гьанже щибха кколеб бугеб? Доб заманалда нижеца кванарабги кванан, нижехъ рега-рахъунги рукӏун, гьанже рачӏунел руго ниж чӏвазе!
«Кьолебани нижехъеги ярагъ, гьал малгӏунал тӏагӏинаризе», — ян абулеб рагӏана гӏолохъабазул гурулъан цояс. Магжилазул рахӏат холеб букӏана нижехъги ралагьун. Бищунго гьезие рекӏее гӏолел рукӏинчӏо Гӏабдулал рагӏаби. Нахъаса къотӏичӏого гьес гьезда абулеб букӏана: «Убейте меня здесь! Если сегодня вы не убьете меня, то завтра я начну убивать вас», — ян.
— Нужеда рихьулел кьурабиги ганчӏалги гурони гьечӏеб бакӏалде щиб босизе нуж рачӏун ругел? — ан дир хъизамалъ абидал, цояс жаваб гьабуна:
— Ниж гьанире рачӏун руго Россиялъул кверщаликь ругел Дагъистаналъул бусурбаби эркен гьаризе, цӏияб дин нужеда малъизе ва…
— Нижерго бацӏцӏадаб дин нижее гӏун буго! Нужецаги нуж таразги дин малъизе кколел гӏадамал гуро ниж! — ан абуна Гӏабдулаца, магжилавги гьоркьов къотӏизавун.
«Гьав хӏалакъав, борхатаб лага-черхалъул, гьимун гурони гӏадамасда кӏалъаларев школалъул учителас, анцӏ-анцӏ соназ шадрадерил гӏун бачӏунеб гӏелалъе тарбияги, лъайги, гӏакълуги кьурав чияс, жакъа росдал гӏолохъабаздаги жамагӏаталдаги цебе бихьизабулеб буго бахӏарчилъиги ва кин бокьизе, цӏунизе кколеб жив вижараб, гӏураб ракь», — ан абурал пикраби рачӏана дир ботӏролъе.
Гӏураб заман бана магжилазулгун накъитазда. Цин букӏунаан гӏодобе биччараб, гӏакълуяб хабар, камулароан тӏаде нарт тӏолелги.
— Гьанже заман щвана, — ян бичӏчӏизе захӏматаб магӏарул мацӏалъ кӏалъана цояв. — Кӏиго нугӏгун нужер рахъалдасан, кӏиго нижер диналъул вацалгун гьав бидулав (Гӏабдуладе килищги битӏун) щвезавизе ккола аскӏоб бугеб шаригӏаталъул судалде. Гьеб судалъ къотӏизе буго гьасие хӏукму.
Жиндирго машинаялъул рулалда нахъа чӏана Сурхаев Шамил, дун — гьесул хьолбода, нижеда нахъа — Гӏабдула, гьесул хьолбохъ магжилазул кӏигояв. Нухда унаго лъана цояв магжилав Ведено районалъул Харайчӏо росулъа Ислам вукӏин, кӏиабилев -Афгъанистаналъул Кандагаралдаса афгъанав.
— Мунгӏаги щиб босизе вачӏун вугев? — илан ахӏун абулеб букӏана Гӏабдулаца гьесда. Кӏалдире рачӏарал рагӏаби абулел рукӏана гьес гӏурус ва магӏарул мацӏалъ.
Ракӏалде кколеб букӏана хъвадарухъанас хъвараб маргьацин гурищ гьаб жойилан. Гьеб гьедин гьечӏеблъи бичӏчӏана росу тун къватӏире щведал, чӏезе машинаги гьабун, ккун гъванщагун къватӏире рехараб заманалда. Гьес Гӏабдула Гӏалиевичасул магьдилъ автоматалъул хӏараги тункун, ццидаца цӏурал берал дидаги Шамилидаги речӏчӏизарун, абуна:
— Я своего родного брата убил за то, что он сотрудничал с оккупационными войсками! Вас убивать мне что муху убить!
— Убей! — янги абун, магьдида цун бугеб автоматалъул хӏара аскӏобе цӏана Гӏабдулаца.
Маслихӏат ккана Шодроде гӏедегӏун унел магжилазул кумекалдалъун. Кканиги щиб, Исламица байбихьана ахӏдезе, гӏантав чи кинигин кьвагьдезе, тунка-гӏусун машинаялде жанире ниж къазаризе.
Гьедин щвана Рахатӏе, Хаттабил штабалде. Гьенисаги ритӏана Ансалтӏе, Шамил Басаевасул штабалде. Гӏабдула цо минаялъуве вачун ана.
Гьоркьоб гӏурабго заман ун хадуб штабалдаса къватӏире рачӏана, яргъилаз сверунги ккун, Шамил Басаевги, гьимулаго Гӏабдула Гӏалиевичги. Гьезухъ ралагьун нижеда бичӏчӏулеб букӏана шаригӏаталъул суд букӏараблъи, амма лъалеб букӏинчӏо кинаб хӏукму къотӏарабали.
— Гьале нижер машинаги, гьале ниж кӏигоялги, нужеца абураб къагӏидаялъ гьав Гӏабдулаца лъукъаравги сах гьавила, виччанте Гӏабдула, — ян нижеца гьаридал, Басаевас, чӏухӏадго, абуна:
— Он пустил кровь нашему муджахеду, и мы должны пустить его кровь тоже, — ян.
Гьеб къоялъ УАЗалда рекӏинавун вачун арав Гӏабдула Хӏамидов хабар къотӏана лъабго-ункъо моцӏалъ. Хадуб рагӏана Чачаналда гӏумру гьабулел гьесул гӏагарлъиялъул кумекалдалъун гьев къватӏиве виччан вугин.
Гьединав бахӏарчияв инсан вукӏана Гӏабдула.