Рекӏелгъеялъе
Бертин гьабилалде лъабго къоялъ цебе Малайзиялда бахӏаразе бегьуларо я кваназе, я лъим гьекъезе, ялъуни чвердезе.
Борнеоялдайин абуни, магьари лъелалде цебе, лъабго сордо-къоялъ бахӏарал хӏажатханаялде ине бегьуларо. Гьединаб гӏазаб гьезда хӏехьезе кӏвани, цӏияб хъизамалъул гӏумру талихӏаб букӏунин рикӏкӏуна гьениб.
Шотландиялъулаз бахӏарай, бертин гьабилелде, чвердезаюла хӏарщулъ.
Швециялда, къинай яхъинчӏого, чӏужугӏадан росасе ине бегьулароан. Гьедин гьез бихьизабизе кколаан жал лъимер гьабизе бажарулел чагӏи рукӏин.
Албаниялда, бертин гьабуралдаса, рос лъабго къоялъ лъадуда хъвазе бегьулароан.
Япониялдаги Норвегиялдаги тарбия гьечӏолъилъун рикӏкӏунаро жамгӏияб транспорталда рекӏарал херал чагӏазе бакӏ тунгутӏи. Гьелъул гӏаксалда, гьезие бакӏ эркен гьаби рикӏкӏуна харабазул адаб хвезабилъун. Щайгурелъул гьелдалъун цогидазда бихьизабулеб букӏун гьел херал яги сахлъи гьечӏел чагӏи рукӏин.
Америкаялда рос-лъадуца рестораналда квана-гьекъаралъухъ батӏа-батӏаго кьола гӏарац.
Китаялда, гьаюраб къо баркунцин лъадуе тӏугьдул сайгъаталъе кьей адаб гьечӏолъиялъул гӏаламатлъун рикӏкӏуна. Гьениб абула, гьелдалъун бичӏчӏизабулеб бугин рукъ гӏураб къагӏидаялда берцинго къачӏан гьечӏеблъи ва гьеб берцин гьабизе дуе бокьун букӏин.
Норвегиялда лъиениги рецц-бакъ гьабизе бегьуларо. Кигӏан кӏудияб бергьенлъи босаниги, цӏалдохъанцин веццулев гьечӏо тӏолабго классалда цеве.
Турциялъул бихьиназ кӏиабилей лъади ячине бегьуларо, тӏоцеесей лъадуе анцӏазарго долларалъул багьаяб месед кьечӏого. Гьелдалъун бихьинчияс бихьизабулила жиндихъа чанго лъади хьихьун бажарулеблъи.
Индиялда руччабазул квер бачин рикӏкӏуна гьей къабихӏ гьайилъун.
Цебе Китаялда гӏадатлъун букӏана хӏатӏал катница дугъдазарун рухьунеб гӏадат. Гьедин гьабиялъе гӏиллаги букӏана хӏатӏал кӏодолъичӏого рукӏин. Гьитӏинал хӏатӏал берцинлъилъун рикӏкӏунаан гьенир.
Ясаз захӏматаб унти хӏехьезе кколеб ва гьезие рилълъанхъизе захӏмалъулеб букӏиналъ, 1912 соналда гьеб гӏадат хвезабуна. Амма улкаялъул цо-цо регионазда гьеб жеги цӏунун хутӏун буго.
Андаман чӏинкӏиллъабазда гӏумру гьабун ругел, цоцазда дандчӏвайдал, цояв цогидасул накалдаги кӏусун, гьесда къвалги бан, гӏодизе байбихьула. Гьедин загьир гьабула гьез жидерго рохел.
Тибеталъулазул гӏадат буго, цоцада дандчӏвайдал, мацӏ бихьизабулеб.
Вьетнамалда кӏалъалесул бадире балагьуларо. Гьелъие буго кӏиго гӏилла: тӏоцебесеб — вьетнамалъулазе хасиятаб буго нич, кӏиабилеб – жив кӏалъалев хъулухъалда вугев чи ватизе рес букӏин.
Танзаниялда квегӏаб квер чорокаблъун, кваранаб бацӏцӏадаблъун рикӏкӏуна. Гьединлъидал гьениб квегӏаб квералъ я кваназе, я сайгъат кьезе бегьуларо.
Бенгал заливалда ругел Никобар чӏинкӏиллъабазда лъади ячине бокьарав бихьинчи анлъго моцӏалъ бахӏаралъул лагълъиялда вукӏине кколаан. Гьеб болжалалда жаниб гьесие ине яс разилъани, росдал советалъ хъизан гьабизе изну кьолаан, разилъичӏони, «бахӏарав» жиндирго рокъове тӏадвуссунаан.
Централияб Нигериялда росасе ине заман щварал ясал, кьаралъизелъун, кваназарула. Гьелъие гӏиллаги ккола гьениб кьариял руччабазул къимат гьабулеб букӏин ва бечедал чагӏаз гьединал лъудбилъун рачунел рукӏин.
Нури Нуриев