Гьаб анкьалда «Хӏакъикъат» газеталъул редакциялда тӏобитӏана видеоконференция. Дандчӏваялде ахӏун рукӏана республикаялъул хъутабазул ракьазда ругел школазул авар мацӏалъул учительзаби, лъай кьеялъул управлениялъул куратор ва методист Нуцалай Мирзабековагун цадахъ.
Учительзабаздехун кӏалъай гьабуна газеталъул редактор Гӏумахан Гӏумахановас, жавабияв секретарь Мухӏамадхӏабиб Махӏатӏовас, мухбирзаби Шамай Хъазанбиевалъ ва Кавсарат Сулеймановалъ.
— Нилъеца цадахъ лъугьун гьабулеб буго гӏаммаб хӏалтӏи – рахьдал мацӏ цӏуни. Школалда бачӏунеб гӏелалъе нужецаги, газеталдаса магӏарулазе нижецаги бицунеб буго миллаталъул гӏадатал-гӏамалазулги, маданият-адабиятлъулги, тарихалъулги хӏакъалъулъ. Амма ахираб заманалда загӏиплъулеб буго, тӏоцебесеб иргаялда, нилъерго мацӏалдехун бугеб бербалагьи. гӏемерисел учительзабаз абула тӏахьал гьечӏилан. Тӏахьал щвезегӏан, масала, кӏудияб кумек букӏуна «Хӏакъикъат» газеталъул. Миллаталъул матӏулъун кколеб нилъер газета цӏунизе ккола цадахъ лъугьун…
Гьадинаб букӏана газеталъул хӏалтӏухъабаз учительзабазде гьабураб хитӏабалъул магӏна.
Кӏалъазе рахъарал учительзабазги бицана хъутабазул школазда мацӏ малъиялъе гьабулеб бугеб хӏалтӏул хӏакъалъулъ.
— Нижер школазда гьеб рахъалъ гьабулеб хӏалтӏи квеш гьечӏо. Гӏемерисел учительзабаз хъван буго газетаги. Нижеца жеги щула гьабила нужергун бухьенги. Гьединго газеталъул гӏумруялъулъ гӏахьал гьарила цӏалдохъабиги, — ян бицана гьез.
Палхӏасил, къотӏи ккана газеталъулги учительзабазулги гьудуллъи жеги щула гьабизе.
Гьединалго видеоконференциял газеталъул редакциялъ тӏоритӏизе руго магӏарул районазул цогидалги школазул учительзабазулгунги.